Ish-komandanti i Gardës së Republikës, Ndrea Prendi ka lënë ambientet e SPAK, ku është marrë në pyetje rreth dosjes së “21 Janarit”.
Ai ka dëshmuar për rreth 3 orë, teksa pas daljes nga Prokuroria e Posaçme është munduar t’i shmanget prononcimit për mediat. Në ecje e sipër ai ka deklaruar për gazetarët se në SPAK do të vijë sa herë që ta thërrasin dhe për çdo gjë të mundshme.
Pyetje: Për çfarë ishit thirrur? Do vini sërish në SPAK?
Ndrea Prendi: Sa herë të na thërrasin!
Pyetje: Për çështjen e 21 Janarit?
Ndrea Prendi: Për çdo gjë!
Thirrja e Ndrea Prendit në SPAK vjen pas rihapjes së dosjes së “21 Janarit”, teksa ai është marrë në pyetje si një prej të kallëzuarve nga familjarët e të ndjerit Aleks Nika, i cili ishte një prej 4 protestuesve që u vra në bulevard.
Ndërkohë ditën e djeshme dëshmuan në SPAK edhe Rajmdona Nika, e veja e Aleks Nikës, si dhe xhaxhai i tij, Mark Nika, në cilësinë e kallëzuesve.
SPAK raporti javën e kaluar se kishte regjistruar procedimin penal për vrasjen e Aleks Nikës, si dhe plagosjen e shtetasve Artes Dybeli, Ilia Qesko dhe Ilia Papa në protestën e 11 Janarit të vitit 2011, në bulevardin “Dëshmorët e Kombit”.
Procedimi penal është regjistruar për veprat penale: “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave; “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim.
Në njoftimin e SPAK thuhet se ky procedim penal është regjistruar në zbatim të vendimit të Kolegjit të Gjykatës së Lartë më 12 Mars, e cila vendosi që çështja të hetohet nga Prokuroria e Posaçme pas kallëzimit të Rajmona Nikës, e veja e Aleks Nikës.
Gjykata e Lartë detyroi SPAK-un të regjistrojë procedimin penal për “21 Janarin” dhe të hetojë kallëzimin penal të bërë nga Rajmonda Nika, ndaj Sali Berishës, Lulzim Bashës, Ndrea Prendit dhe Agim Llupos.
Gjithashtu, sipas SPAK, ky procedim penal është regjistruar dhe në bazë të vendimit të Gjykata së Strasburgut më 14 Nëntor të vitit të kaluar, ku GJEDNJ në përfundim të çështjes ka konstatuar shkelje të nenit 2, të Konventës Evropiane për të Drejtat e Njeriut, si në aspektin material ashtu dhe në atë procedural.
Më herët, Prokuroria e Posaçme (SPAK) ka shpallur disa herë moskompetencë për hetimin e dosjes së “21 Janarit”, jo vetëm për padinë e familjarëve të viktimave, por edhe atë të bërë nga Ministria e Drejtësisë dhe Partia Socialiste.
Kujtojmë se në demonstratën e 21 Janarit të vitit 2011 u vranë Aleks Nika, Hekuran Deda, Ziver Veizi dhe Faik Myrtaj. Gjykata ka vlerësuar se vrasjet e Ziver Veizit dhe Faik Myrtajt kanë ndodhur nga pakujdesia dhe dënoi ish-komandantin e Gardës, Ndrea Prendi me një vit burg, si dhe gardistin Agim Llupo me 3 vite.
Vrasjet e Aleks Nikës dhe Hekuran Dedës dhe plagosja me armë zjarri e 6 personave të tjerë, gjatë protestës së Partisë Socialiste para kryeministrisë, ka mbetur pa autorë dhe prokuroria e pati pezulluar atë për vite me rradhë në kërkim të provave.
