Deputeti Arbi Agalliu ka reaguar në lidhje me presionin që socialistët i bënë kreut të Kontrollit të Lartë të Shtetit, Arben Shehu gjatë raportimit në Komisionin e Ekonomisë, për shkak të raporteve të auditimit të KLSH që nxjerr zbuluar korrupsionin masiv në institucionet shtetërore.
Në një postim në rrjetet sociale, Agalliu shkruan se është jo vetëm e ekzagjeruar, por edhe abuzive sjellja ndaj kreut të KLSH-së, duke e thirrur 3 herë për raportim, ndërkohë që sipas tij, nuk zbatohet i njëjti standard për INSTAT, Bankën Qëndrore, Autoritetin e Konkurrencës, etj.
Deputeti shton më tej se i kërkohet llogari KLSH-së, në vend që të thirren institucionet të cilat kanë bërë shkelje dhe të raportojnë e mbajnë përgjegjësi për abuzimet që kanë bërë. Agalliu deklaron se KLSH e drejtuar nga Arben Shehu ka bërë një punë me korrektësi dhe saktësi, nisur nga fakti që institucionet e audituara kanë pranuar 97% të rekomandimeve.
Ligjvënësi shton më tej se është e pafalshme që deputetët e mazhorancës që të mos lexojnë raportet që KLSH sjell, duke i bërë pyetje jashtë tematikës.
Agalliu shkruan se është e kuptueshme që gjithë këtë presion ndaj kreut të KLSH-së u bë për të mbyllur një sy gjatë auditimeve ndaj institucioneve publike, por sipas tij, abuzimi në shumë institucione duken edhe me të dy sytë mbyllur.
Reagimi i plotë:
Gjatë kësaj jave në “Komisionin për Ekonominë dhe Financat” u thirr për raportim 3 herë Kontrolli i Lartë i Shtetit.
Personalisht mendoj se jo vetëm është ekzagjeruar por edhe është abuzuar me sjelljen ndaj KLSH. Ndërkohë që nuk zbatohet i njëjti standard për INSTAT, Bankën Qëndrore, Autoritetin e Konkurrencës, etj.
Në vend që të thirren institucionet të cilat kanë bërë shkelje dhe të raportojnë e mbajnë përgjegjësi për abuzimet që kanë bërë, fatkeqësisht i kërkohet llogari KLSH-së.
Nga ana tjetër fakti që institucionet e audituara kanë pranuar 97% të rekomandimeve që KLSH ka bërë, tregon korrektësinë dhe saktësinë e punës së KLSH.
Po kështu është e pa falshme që të mos lexojnë raportet që KLSH sjell (këtë herë rreth 160 raporte) dhe pyetjet bëhen jashtë tematikës për të cilën raporton KLSH.
Po kështu e pa falshme është që të mos dijnë cfarë rezolute kanë votuar për KLSH dhe i kërkojnë llogari KLSH për gjetjet.
Si përfundim arsyeja kuptohet! Presion për të mbyllur një sy gjatë auditimeve ndaj institucioneve publike. Por abuzimi në shumë institucione duken edhe me të dy sytë mbyllur.
