Janë zbardhur detaje të reja nga aksidenti tragjik i regjistruar mesditën e kësaj të premte në aksin rrugor Lushnjë-Karbunarë, ku një motor është përplasur me një biçikletë në korsinë e ndarë që shërben vetëm për biçikletat në këtë rrugë.
Mësohet se si pasojë e aksidentit ka gjetur vdekjen drejtuesi i biçikletës, Fitim Xhafa, 50 vjeç, i cili ka qenë dhëndër në Karbunarë. Ndërsa drejtuesi i motorit mësohet se është shtetasi Jovan Liçi, 61 vjeç, i cili ka mbetur i plagosur dhe ndodhet në gjendje të rëndë.
Burime bëjnë me dije se të dë dy kanë qenë duke udhëtuar në të njëjtin drejtim kur janë përplasur me njëri-tjetrin.
50-vjeçarit pas rrëzimit nga biçikleta i ka rënë koka në gurët prej betoni të korsisë së biçikletës duke gjetur vdekjen e menjëhershme. Ndërsa 61-vjeçari ka vazhduar ecjen për rreth 30 metër me motor pasatj është rrëzuar.
Policia ndodhet në vendin e ngjarjes dhe po punon për zbardhjen e plotë të rrethanave të aksidentit.
Ky aks rrugor prej disa vitesh ka në njërën anë të tij bordura të vogla që ndajnë qarkullimin e mjeteve nga biçikletat dhe shpesh herë këto bordura janë bërë shkak për aksidente, ku ky i sotmi ka kushtuar një jetë personi.
