Inceneratori i Tiranës, për deputeten demokrate, Jorida Tabaku do të jetë një tregues që do të konfirmojë nëse SPAK do të shkojë aty ku është pushteti, apo jo. E ftuar në emisionin “Debat” në A2 CNN nga Alba Alishani, Tabaku tha se pavarësisht kritikave që mund të ketë për punën e Prokurorisë së Posaçme, nuk e sulmon atë kurrsesi.
“Nuk e sulmoj SPAK dhe asnjë nga institucionet e drejtësisë, i inkurajoj që të punojnë dhe të punojnë akoma më shumë, jemi në një moment ku inceneratori i Tiranës do të jetë një tregues në SPAK shkon dot aty ku është pushteti apo jo”, tha Tabaku.
Duke e cilësuar si një ditë e mirë, ditën kur drejtësia do të funksionojë për kryebashkiakun Erion Veliaj, Tabaku tha se ndaj tij duhet të ketë një hetim pasuror.
“Unë pres që inceneratori i Tiranës të vazhdojë hetimet që lidhen edhe me hetimin pasuror të kryetarit të Bashkisë, të cilat jo se është një dëshirë e imja, por kam dorëzuar një padi për inceneratorin e Tiranës në 2020 dhe 12 padi vijuese pas Komisionit Hetimor, dhe jam e sigurt që dhe nga leximi i dosjes që ka sjellë Prokuroria dhe për Arben Ahmetaj që ka akoma dhe më shumë”, shtoi deputetja.
Në fund, për demokraten, në inceneratorin e Tiranës kanë funksionuar të gjithë të akuzuarit si një grup i strukturuar kriminal, dhe këtë akuzë e ka ngritur edhe ajo vetë si drejtuese e Komisionit Hetimor.
