Kreu i grupit parlamentar të Partisë Demokratike, Gazment Bardhi ka reaguar pas vendimit të Gjykatës Kushtetuese, e cila i refuzoi kërkesën Kuvendit (PS-së) për të kërkuar opinionin e Komisionit të Venecias për mandatin e deputetes Olta Xhaçka, e cila akuzohet për konflikt interesi për shpalljen e bashkëshortit të saj, Artan Gaçi investitor strategjik me vendim të Këshillit të Ministrave. Sipas Kushtetueses, mazhoranca sfidoi gjykatën duke mos zbatuar vendimin e saj.
Ndërkohë, në një postim në rrjetet sociale, Bardhi shkruan se kryeministri Edi Rama keqpërdori deputetët për t’i dhënë mbrojtje Olta Xhaçkës. Ai paralajëmron kallëzimin për të gjitha ata që kanë penguar prej më shumë se 1 viti zbatimin e vendimit të Gjykatës për mandatin e Xhaçkës.
“Edi Rama keqpërdori deputetët e tij për ti dhënë mbrojtje politike bashkëpunëtores së tij të afërt Olta Xhaçka, duke vendosur për herë të parë standardin e moszbatimit të një vendimi konkret të Gjykatës Kushtetuese. Pasi në kundërshtim me Kushtetutën dhe ligjin e bëri ministren e tij investitore strategjike, në një pronë publike të grabitur me dokumente të falsifikuara, Edi Rama i dha asaj edhe statusin “e paprekshme” nga drejtësia.
Grupi Parlamentar i Partisë Demokratike dhe deputetët e opozitës u rreshtuan edhe një herë në mbrojtje të kushtetutshmërisë dhe interesit publik. Ndërkohë u provua edhe njëherë se Edi Rama dhe deputetët e tij u rreshtuan në krah të interesit privat të oborrit të Edi Ramës, që pasuritë publike i kanë shndërruar në plaçkë për veten e tyre.
Vendimi i sotëm i Gjykatës Kushtetuese është edhe një aktakuzë penale për të gjithë deputetët që me vetëdije dhe për motive politike penguan ekzekutimin e vendimit të gjykatës. Grupi Parlamentar i Partisë Demokratike, po përgatit kallëzim penal ndaj të gjithë përgjegjësve që për më shumë se 1 vit kanë penguar ekzekutimin e këtij vendimi të Gjykatës Kushtetuese”, shkruan Bardhi.
