Pak ditë më parë u publikuan të dhënat e Censit të popullsisë dhe banesave, ish-drejtoresha e INSTAT, Ines Nurja tha se kemi një rënie të numrit të popullsisë që jeton në Shqipëri, por shtoi se shifra nuk është 400 mijë, por minimalisht 480 mijë persona.
“Po ti shtojmë edhe 108 mijë që janë rikthyer këto 12 vite, pra që janë larguar por që mund të jenë rikthyer, atëherë numri i të larguarve është rreth 600 mijë. Janë të paktën 508 mijë vetë që në 12 vite janë larguar nga Shqipëria. Njëkohësisht kemi rreth 190 mijë që kanë aplikuar për azil, sikundër kemi edhe 300 mijë që rrinë në mënyrë të paligjshme. Dhe këtu kemi vetëm shqiptarët në vendet e BE-së. Pra në total mund të jenë mbi 900 mijë persona, sipas shifrave të Eurostat”, tha Nurja.
E ftuar në News24 u shpreh se po të shikohen shifrat e arsimit të lartë, kemi rreth 220 mijë nxënës më pak.
“Këta nuk largohen vetëm, por bashkë me familjen, pra kjo është një tjetër arsye që shifra e publikuar për INSTAT për 400 mijë më pak nuk qëndron”, tha Nurja.
Në vijim ajo vuri theksin se për publikimin e shifrave me 8 muaj me vonesë është shumë e papranueshme.
