Nga Boldnews.al
Ndoshta shumë nga Rilindja mund të jenë mërzitur për arrestimin e ish-ministrit dhe kolegut të tyre të dashur Ilir Beqja, por e sigurt është se vetë i prangosuri nuk do jetë shqetësuar shumë, e aq më pak “kryeregjisori” i drejtësisë së re dhe miku i tij i kahershëm. Ish-ministri që po hetohet i lirë për aferën e frikshme 120 milionë euro në shëndetësi, u arrestua për akuzën se ka shpenzuar ca lekë nga donacionet e BE-së për dreka e darka. Një akuzë minore para megaskandalit në shëndetësi që vret pacientët e grabit çdo ditë qindra mijëra euro.
Po më shumë ky arrestim i shkon përshtat, “babait të reformës në drejtësi”, Edi Ramës. I ndërgjegjshëm se “korrupsioni i ka ikur me kohë nga duart”, Rama po tenton të mbulojë me propagandë dhe mbrojë në maksimum pikërisht bishtat e drejtësisë së re. Së pari ngrihet edhe më shumë miti i rremë se SPAK po godet të fuqishmit e po lufton korrupsionin. Mjafton kaq që histerizmi kolektiv të shpërthejë në rrjetet sociale, duke i ngritur lavde drejtësisë së re. Madje, nuk është çudi që të nisin dhe stampohen bluza me fytyrat e SPAK-istave, për tua veshur fëmijëve tanë si “heronj”.
Ende se besoni? Faktet janë të freskëta dhe pse koha duhet e largët. “Duhet të jemi krenar për faktin se tani jeni duke u bërë tmerri i kriminelëve. Jeni heronjtë e fëmijëve. Ju jeni shpresa e vendit, për këtë ju falenderoj, ju mbështes dhe ju nxis”. Kështu tha në dhjetor të vitit 2021 ish-ambasadorja amerikane Yuri Kim. Këtë mit të rremë, se drejtësia e re është e pavarur dhe “babai i saj” është vetë Rama, i mbështetur me “stimulantët e ereksionit” të prodhuar nga SHBA-BE, po vijohet të ngulitet thellë në botën e errët propagandistike.
Veç propagandës, Rama mori tre “honorare” të menjëhershme politikisht. Arrestimi i Beqjat minimalisht shtyn në kohë ndonjë “masë sigurie” ndaj kryebashkiakut të Tiranës Erion Veliaj, i dyshuar se është zhytuar aq thellë në çështjen e inceneratorëve sa edhe kur tenton “vetëdjegien” e shpëton ai i madhi… Babai i reformës. Lali duhet të jetë ca i qetë. Për disa muaj ka plot arsye që propaganda e pështirë që nis në zyrën e përhimtë në Bulevardin “Dëshmorët e Kombit” dhe përfundon në oligarkinë mediatike të qeverisë, të mbajë ndezur një pishtar haluçinativ se “arrestimi i Ilir Beqjas është treguesi se drejtësia e re është e pavaruar dhe se ka mbështetjen e fortë të amerikanëve”.
Beqja u “vetëofrua” që për interes të partisë, të bëjë pak kohë burg, për tu futur më pas në procesin që dihet: Pak ditë burg, pastaj “arrest shtëpie”, e në fund një dënim i lehtë, pa iu prekur asnjë cen nga superpasuria e vendosur nga korrupsioni.
Po kush është fitorja e tretë e Ramës? Sa “hekuri është i nxehtë” me Beqjen që do shfaqet duarpragosur, ndonjë urdhër-arresti i freskët mund të dalë nga SPAK… Këtë herë ndoshta një tjetër Ilir do bëhet “kurban”, por nga ana tjetër, bash e në strofullën e opozitës që mbetet ende e çoroditur dhe pa ide. Një Ilir nuk ëhtë i lirë, një tjetër Ilir është ende e lirë dhe “babai i drejtësisë së re” e ka gati fjalimin: “Unë e krijova SPAK-un të lirë e të pavarur, që të godasë miqtë apo armiqtë e mi politik, të gjitha ata që kanë futur duart në xhepat e qytetarëve….! Dhe propaganda do vijojë për zgjedhjet 2025 pasi do stampohet bluza me “kryeheroin” tonë për mandatin e katërt, pestë e sa të ketë ymër…
