Policia e Shkodrës ka arrestuar organizatorin e trafikut të klandestinëve nga Pakistani që humbën jetë në aksidentin tragjik të 2 Prillit në Këlcyrë, bashke me drejtuesin e mjetit.
Në pranga është vënë Stivljano Ndou, 24 vjeç, banues në Shkodër. Ai ishte shpallur në kërkim nga Policia e Gjirokastrës për veprën penale “Ndihma për kalim të paligjshëm të kufijve”, kryer në bashkëpunim, teksa arratia e tij ka marrë fund pas 3 muajsh.
“Nga hetimet e kryera ka rezultuar se ky shtetas, kundrejt pagesës, ka organizuar në bashkëpunim me 3 shtetas të tjerë (drejtuesin e automjetit, i cili humbi jetën në aksident, dhe me shtetasit Agustin Gjeta dhe Ramazan Dekovi, të cilët u arrestuan më datë 03.04.2024), transportimin e 7 emigrantëve nga Pakistani, të cilët synonin të kalonin ilegalisht kufijtë, me destinacion shtetet e BE-së.”– thuhet në njoftimin e Policisë.
Burime bëjnë me dije se Stivljano Ndou ka tentuar t’i arratisej uniformave blu me një motor me të cilin po udhëtonte, por nuk ia ka dalë dot.
24-vjeçari i është dorëzuar shërbimeve të Policisë së Gjirokastrës për kryerjen e veprimeve të mëtejshme procedurale.
Agustin Gjeta, i arrestuar më 3 Prill është pronar i automjetit tip “Mercedes Benz” me të cilën shoferi Edison Bregaj shkatkoi aksidentin, duke humbur jetën bashkë me 7 klandestinët nga Pakistani. Fillimisht u raportua se ia kishte dhënë me qira makinën Edison Bregajt, por më pas rezultoi se ata bashkëpunonin në krim për të ndihmuar klandestinët nga vendet e treta në këmbim të fitimit, bashkë me Ramazan Dekovi, i cili po ashtu u arrestua më 3 Prill.
Refugjatët klandestinë që humbën jetën ishin me origjinë nga Pakistani dhe ishin të gjithë nën 30 vjeç. Edison Bregaj dhe 7 klandestinët në aurtomjetin tip “Mercedes Benz” kanë qenë duke udhëtuar nga pika kufitare e Tre Urave në drejtim të Këlcyrës.
Dyshohet se patrulla e policisë pikasi mjetin e dyshimtë afër Këlcyrës rreth orës 02:00, por drejtuesi i “Benz-it” refuzoi që të ndalonte për kontroll. Shoferi Edison Bregaj, cili po udhëtonte drejt Këlcyrës është kthyer në rrugë dhe ka tentuar të arratiset drejt Përmetit.
Pas ndjekjes nga policia, duket se automjeti ka humbur gjurmët, ndërsa pas shumë kontrolleve u verifikua se “Benz-i” kishte përfunduar në shtratin e lumit Vjosë.
Në momentin e daljes nga rruga pranë kthesës së Kuqarit, mendohet të ketë qenë me shpejtësi rreth 180 km në orë. Mjeti ka fluturuar në linjë ajrore rreth 200 m dhe më pas është përmbysur në një shpat të pjerrët buzë Vjosës. Shpejtësia e mjetit ka vijuar të jetë e lartë duke e shtyrë atë edhe gati 100 m të tjerë.
Klandestinët kanë dalë nga automjeti në momente të ndryshme dhe kanë humbur jetën në vend. Disa prej tyre ishin bllokuar brenda në mjet dhe janë nxjerrë me shumë vështirësi pas disa orësh.
