Nga Boldnews.al
Hetimi sipërfaqësor i prokurorit të Tiranës, Bledar Valikaj, në çështjen e skandalit të Onkologjikut, duket se ka lënë të pakënaqur edhe kryeministrin Edi Rama.
Në një takim propagandistik me drejtuesit e Qendrës Spitalore Universitare Tiranë (QSUT) dhe shefat e pavionëve, zhvilluar në fillim të kësaj jave, Rama ka një opinion të tijin për veprën penale të kryer nga mjekët dhe stafi administrativ i Spitalit Onkologjik.
“Të kesh marrë diplomën dhe licencën dhe ta përdorësh uniformën si maskat e grabitqarëve të bankave për të nxjerrë para me gjakun dhe ilaçet është krim jo kundër tyre, por kundër të gjithë njerëzimit. S’mund të thuhet që sistemin shëndetësor është çliruar nga kthetrat e korrupsionit, rrjeta e merimangave në QSUT ishte edhe më keq, krim kundër të gjithë njerëzimit, krim kundër njerëzores…”, deklaroi ndër të tjera Rama.
Megjithëse formimi i tij profesional është vite drite larg çështjeve të drejtësisë, deklarimet e Ramës tregojnë se ai nuk është aspak i kënaqur me penalitetet që kanë marrë deri më tani personat nën hetim, pavarësisht se në vijim shtoi fjalinë që “drejtësia e bëri edhe një herë punën e vet dhe kjo është e mira e vetme e asaj të keqeje tronditëse që doli në pah me atë shëmtinë e tmerrshme, gjë për të cilën unë i përgëzoj prokurorët..”.
Në mesjavën e kaluar, gjykata e Tiranës pranoi kërkesat e prokurorisë për caktimin e masave të sigurimit për dy mjekë dhe disa anëtarë të stafit administrativ të Spitalit Onkologjik në Tiranë.
Në bazë të hetimit të deritanishëm, gjykata caktoi masën e sigurimit “arrest në shtëpi” për mjekun Edmond Gashi dhe masën “detyrim paraqitje” për mjeket Brikena Qirjazi e Alketa Ymeri, si edhe për stafin administrativ Emiljano Lela e Drilona Krishta.
Të gjithë këta dyshohet se kanë konsulmuar elementët e veprës penale të “Shpërdorimit të detyrës”, megjithëse të dhënat e siguruara gjatë hetimit tregonin se stafi i Onkologjikut duket të ishte përfshirë në skemë korrupsioni më shumë se një herë.
Hetimet e prokurorit Valikaj, njëkohësisht edhe bashkëshort i deputetes socialiste, Ermonela Felaj, duket se ende nuk kanë arritur të sigurojnë prova të mjaftueshme për të rënduar pozitën proceduriale të personave nën hetim.
Ata aktualisht mbajnë mbi supe dyshime për një vepër jo shumë të rëndë penale, ndërkohë që masat e sigurimit janë të lehta, gjë që dëshmon se, përtej pritshmërisë së publikut, hetimi penal nuk ka arritur të godasë në themel të skandalit me spitalin publik.
“Boldnews.al” analizoi më herët se hetimi i Prokurorisë së Tiranës për skandalin tek Onkologjiku ishte sipërfaqësor dhe se rezultatet, të paktën deri më tani, duken tejet anemike, përballë situatës reale që ekziston jo vetëm tek ky Spital, por është i përhapur masivisht në të gjithë qendrën shëndetësore më të madhe në vend.
Abuzimi shkon shumë lart/ Hetimi sipërfaqësor te Onkologjiku “tapos” skandalin real
