Siç vepron gjithmonë, kryeministri Edi Rama kërkon t’i hedhë “hi syve” publikut pasi qeveria e tij përfshihet nga skandali në skandal.
Në kulmin e debatit për sistemin shëndetësor të shkatërruar të “Rilindjes”, kreu i qeverisë ka vijuar propagandën e tij të ditës me qëllim për të fituar ndonjë ‘simpati’ në zonat veriure të Shqipërisë, të cilën qeveria socialiste e ka braktisur totalisht.
Rama mesa duket ndihet i ‘frikësuar’ nga zgjedhjet e ardhshme parlamentare të cilat po afrojnë, ndërsa vendi zhytet në varfëri ekstreme dhe shpopullim alarmant, ku të rinjtë shohin si zgjidhje largimin nga Shqipëria.
Rama ka qenë sot në zonën e Thethit në Shkodër ku ka shpërndarë 200 tituj pronësie. Teksa foli për disa problematika, Rama tha se qeveria e tij do të falë gjobat që janë vendosur për ‘ndërtimet pa leje’.
“Sot janë 200 tituj pronësie që janë këtu, një pjesë do ta shpërndajmë tani, pjesën tjetër do ta merrni gjatë ditës. Këtu ka një masë gjobash që janë vendosur si rezultat i ndërtimeve aty ku keni pasur shtëpinë e vjetër që janë bërë për shkak të nevojës për të krijuar ekonomi përmes turizmit dhe që nuk janë ndërtuar sipas ligjit, jo se nuk keni dashur, por sepse shtrëngimi i legjislacionit për këtë zonë të mbrojtur natyrore e ka bërë të pamundur. Qeveria do të falë të gjithë këto gjoba sepse e kemi diskutuar dhe sic e thashë nuk janë tipikisht ndërtime të bërë abuzivisht për t’ju shmangur ligjit”, tha Rama.
