Mjeku Gazment Koduzi thotë se ajo që ndodh në repartin Onkologjik në QSUNT është një ngjarje e patolerueshme dhe e papranueshme.
I ftuar në emisionin “Open” në News24, Koduzi tha se minimalisht këta mjekë kanë shkelur betimin e Hipokratit. Po ashtu, mjeku Koduzi ngriti shqetësimin se spitalet janë të mbushur me koordinatorë që janë patronazhistët.
“Pacienti është në fund të sistemit shëndetësor, mban në shpinën e tij, duke paguar nga xhepi i tij, duke vuajtur pasojat e mungesës së medikamenteve dhe shtretërve. Nga 100 lekë që janë në shëndetësi sot, 60 lekë i paguajnë shqiptarët. 12 % e familjeve shqiptare sot shkojnë në varfëri vetëm se paguajnë për shëndetësinë. Ky sektor nuk ka qenë asnjëherë prioritet, sot zë vetëm 2.9% të GDP-së. Po të ketë mjaftueshëm fonde në shëndetësi, do të ketë më shumë barna, pra nuk do të keni mungesën e medikamenteve. 10% e fondeve shkojnë për konçensionet korruptive që marrin mbi 55 mln euro në vit.
Kur shkoni në spital ai që ju del përpara është polici që ju pyet ku do shkosh? E dini ju që janë mbushur spitalet me koordinatorë që janë patronazhistët. Janë një sesi institiucionesh që nuk funksionojnë. Në Onkologjik janë dy aparatura që nuk funksionojnë për çështje banale”, tha Koduzi.
Tek spitali i Onkologjikut mjekët kishin krijuar një skemë abuzive të transfermit të pacientëve me kancer drejt klinikave private.
Nga hetimi i kryer nga Prokuroria, ka rezultuar se pacientëve të diagnostikuar me tumor nuk u jepej trajtimi i duhur mjekësor dhe më pas drejtoheshin në klinika private. Po ashtu, janë konstatuar raste të blerjes së ilaçeve me vlera të konsiderueshme për kimioterapi, nga farmaci të cilat këto medikamente i tregtonin pa pullën fiskale dhe me kod të prishur, duke krijuar dyshimin në lidhje me autenticitetin e këtyre barnave.
