Zona e juglindjes është përfshirë për të dytën ditë me radhë nga reshjet e shiut dhe breshërit, duke shkaktuar dëme të konsiderueshme në prodhimet bujqësore.
Pasditen e kësaj të hëne ka rënë për rreth 30 minuta breshër në njësinë administrave Voskop të Korçës. Dëmet më të shumta janë shkaktuar në fshatin Voskop, teksa ka patur dëme edhe në fshatrat për rreth në Goskovë, Gjonomadh dhe Lavdar.
Stuhia e breshërit ka dëmtuar kryesisht pemët frutore si mollët dhe kumbullat si dhe në vreshtari, teksa ka shkaktuar dëme dhe tek domatet, specat, patatet dhe fasulet.
Institucionet të pushtetit lokal bëjnë me dije se një grup pune do të ngrihet për të verifikuar në terren dëmet e shkaktuara.
Juglindja u përfshi nga reshjet e breshërit edhe ditën e djeshme, teksa dëmet më të mëdha u shkaktuan në zonën e Kolonjës. Pothuajse çdo vit reshjet e breshlrit kanë dëmtuar kulturat bujqësore në juglindje gjatë verës, teksa ndihma nga ana e shtetit ka qenë minimale.
