Anëtari i kryesisë së Partisë Demokratike Belind Këlliçi, ka publikuar deklaratën e kryebashkiakut Erion Veliajt të vitit 2020 dhe studimin e IFC të vitit 2015 për mbetjet në Tiranë.
Sipas Këlliçit, Veliaj gënjeu duke fshehur të vërtetat e studimit të IFC, që parashikonte një kosto prej 38 eurosh për ton, për gjithë procesin e trajtimit të mbetjeve. Sot, sipas Këlliçit, qytetarët e Tiranës paguajnë 101 euro për ton për gjithë procesin e mbetjeve.
Kjo është deklarata e bërë nga kryebashkiaku i Tiranës Erion Veliaj katër vjet më parë, ku duke iu referuar studimit të IFC, i dilte në mbrojtje skemës për ndërtimin e inceneratorit në Sharrë, pasi sipas tij, kishte kosto më të ulëta.
Këtyre deklaratave të Erion Veliajt, iu përgjigj Anëtari i Kryesisë së Partisë Demokratike Belind Këlliçi, i cili publikoi studimin e IFC. Sipas tij, Erion Veliaj ka fshehur qëllimisht shërbimet që do të ofroheshin për koston prej 38 eurosh për ton që parashikonte studimi i kryer nga banka botërore për pastrimin e Tiranës.
Këlliçi shtoi se Erion Veliaj ka shtuar kostot duke i çuar në 101 euro për ton, për të gjitha proceset e administrimit të mbetjeve në Tiranë, nga 38 euro që parashikonte IFC në studim, të cilin anëtari i kryesisë së PD, ia ka dorëzuar edhe hetuesve të SPAK.
Në përfundim të deklaratës së tij, Belind Këlliçi u bëri thirrje qytetarëve të Tiranës të marrin pjesë në protestën para bashkisë, që do të mbahet ditën e premte datë 21 qershor në orën 11.
