Ashtu siç Boldnews.al e raportoi që më 9 Qershor, Policia e Shtetit e ka konfirmuar ditën e sotme formularin e dytë që do të plotësohet nga efektivët në kuadër të procesit për vetëpastrimin e Policisë.
Bëhet fjalë për urdhrin e firmosur nga Drejtori i Përgjithshëm i Policisë së Shtetit, Muhamet Rrumbullaku “Për miratimin e ‘Formularit të vetëdeklarimit’ mbi verifikimin e integritetit të punonjësve të strukturave të Policisë së Shtetit”.
Efektivëve të Policisë u kërkohet të deklarojnë nëse kanë pasur kontakte me krimin e organizuar apo nëse a kanë pranuar para, favore, dhurata ose pasuri me persona të përfshirë në krimin e organizuar.
LEXO EDHE: Pas dështimit me “Sky”, Balla formular policëve: Deklaroni a keni kontakte me krimin
Këtë formular, autoritetet e konsiderojnë si thellim të procesit të verifikimit të integritetit të punonjësve të Policisë së Shtetit. Kjo për shkak se ky është formulari i dytë që do të plotësohet nga efektivët, pas atij ku do të duhej të deklaronin nëse a kishin qenë përdorues të aplikacionit “Sky Ecc”, ku ishte një dështim i Ministrisë së Brendshme të drejtuar nga Taulant Balla dhe kreut të Policisë së Shtetit Muhamet Rrummbullaku.
Nga ai formular vetëm një efektiv kishte deklaruar se ishte përdorues i aplikacionit “Sky Ecc” dhe siç u tha më pas, edhe ai e kishte deklaruar gabimisht. Ndërkohë, të dhënat e SPAK tregojnë komplet tjetër situatë, ku një numër i madh i efektivëve të Policisë së Shtetit kanë qenë përdorues të aplikacionit “Sky Ecc”.
Edhe nga ky formular i radhës, nuk pritet gjë tjetër, veç se një “show” dhe propagandë nga Balla dhe Rrumbullaku, të cilët presin që policët t’u tregojnë vetë se çfarë kanë përfituar nga krimi.
Pas firmosjes së urdhrit, Rrumbullaku është shprehur se askush që cenon besnikërinë ndaj uniformës së shenjtë të Policisë së Shtetit nuk do të ketë vend në strukturat e saj.
“Integriteti i shëndoshë i punonjësve të Policisë së Shtetit dhe pastrimi i strukturave nga elementë brenda nesh, të cilët shkelin ligjin dhe betimin, është një proces prioritar dhe i rëndësishëm. Askush që cenon besnikërinë ndaj uniformës së shenjtë të Policisë së Shtetit nuk do të ketë vend në strukturat e saj. Kam bindjen e plotë se, organizata e Policisë së Shtetit ka forcën dhe energjinë e duhur pozitive për të izoluar dhe larguar nga radhët e saj çdokënd, që devijon nga misioni i ruajtjes së rendit e sigurisë publike dhe lufta e pakompromis ndaj krimit” – ka deklaruar Rrumbullaku, raporton Policia.
Procesi i vetëdeklarimit do të zgjasë deri më 30 Qershor dhe punonjësit e Policisë së Shtetit do të deklarojnë edhe ndërprerjen e marrëdhënieve juridike të punës me Policinë e Shtetit, për plotësim të pasaktë ose të dhëna të pavërteta në formularin e vetëdeklarimit.
Pikat kyçe që përmban formulari i dytë:
· Dënimi ose jo me vendim gjyqësor të formës së prerë nga autoritetet gjyqësore shqiptare ose të huaja, apo me vendim gjyqësor jopërfundimtar për një çështje penale të pazgjidhur me vendim gjyqësor të formës së prerë;
· Shkelja ose jo e rregullave të sigurisë së informacionit të klasifikuar dhe tentimi ose jo i kryerjes së aktivitetit të paautorizuar në sistemet e komunikimit të informacionit të klasifikuar;
· Qenia ose jo në hetim ose gjykim nga autoritetet shqiptare ose të huaja për vepra penale;
· Qenia ose jo i ndaluar ose arrestuar nga organet ligjzbatuese shqiptare ose të huaja për vepra penale;
· Caktimi ose jo i ndonjë mase shtrënguese të sigurisë personale;
· Lëshimi ose jo i një urdhri kërkimi kombëtar ose ndërkombëtar për vepra penale;
· Pasja ose jo e kontakteve të papërshtatshme, komunikimeve elektronike ose çfarëdolloj mënyre tjetër takimi apo komunikimi të qëllimshëm, me persona të përfshirë në krimin e organizuar;
· Pranimi apo shkëmbimi, ose jo, i parave, favoreve, dhuratave ose pasurive me persona të përfshirë në krimin e organizuar.
Pas dështimit me “Sky”, Balla formular policëve: Deklaroni a keni kontakte me krimin
