Efektivët e Policisë së Shtetit do të duhen të plotësojnë një tjetër formular në kuadër të lidhjeve apo kontakteve me krimin e organizuar.
Ky formular vjen pas atij ku efektivët do të duhej të deklaronin a kishin qenë përdorues të aplikacionit “Sky Ecc”, ku ishte një dështim i Ministrisë së Brendshme të drejtuar nga Taulant Balla dhe kreu i Policisë së Shtetit Muhamet Rrummbullaku.
Nga ai formular vetëm një efektiv kishte deklaruar se ishte përdorues i aplikacionit “Sky Ecc” dhe siç u tha më pas, edhe ai e kishte deklaruar gabimisht. Ndërkohë, të dhënat e SPAK tregojnë komplet tjetër situatë, ku një numër i madh i efektivëve të Policisë së Shtetit kanë qenë përdorues të aplikacionit “Sky Ecc”.
Tashmë, në nismën për vetëpastrimin e Policisë së Shtetit, Taulant Balla dhe Muhamet Rrumbullaku presin që efektivët t’u deklarojnë nëse kanë pasur kontakte me krimin e organizuar, kontakte të çfarëdollojshme, qoftë edhe komunikime elektronike.
Nga ana tjetër ka edhe pyetje nëse punonjësi i policisë ka pranuar apo shkëmbyer para, favore, dhurata ose pasur me persona të përfshirë në krimin e organizuar.
Ky pritet të jetë një dështim i radhës i Taulant Ballës dhe Muhamet Rrumbullakut në procesin e vetëpastrimit të Policisë së Shtetit.
Pyetjet në formularin e vetëdeklarimit “Mbi verifikimin e integritetit të punonjësve të strukturave në Policinë e Shtetit”:
1) A jeni dënuar me vendim të formës së prerë nga autoritetet gjyqësore shqiptare ose të huaja ?
2) A keni kryer shkelje sigurie, a keni shkelur rregullat e sigurisë së informacionit të klasifikuar, a keni tentuar dhe keni arritur të kryeni aktivitet të paautorizuar në sistemet e komunikimit të informacionit të klasifikuar ?
3) A keni në hetim ose gjykim nga autoritetet shqiptare ose të huaja, për vepra penale ?
4) A keni qenë i ndaluar ose arrestuar nga organet ligjzbatuese shqiptare ose të huaja, për vepra penale ?
5) A është caktuar ndaj jush ndonjëherë masë shtrënguese e sigurisë personale ?
6) A është lëshuar ndaj jush urdhër kërkimi kombëtar ose ndërkombëtar për vepra penale ?
7) A keni pasur kontakte të papërshtatshme, komunikime elektronike, ose çfarëdolloj mënyre tjetër takimi apo komunikimi të qëllimshëm, me persona të përfshirë në krim të organizuar?
8) A keni pranuar apo shkëmbyer para, favore, dhurata ose pasuri me persona të përfshirë në krim të organizuar ?
