I ashtuquajtur Komision i Posaçëm Anti-Korrupsion do të zhvillojë ditën e nesërme, e premte, mbledhjen e parë, pas miratimit nga ana e socialistëve në Kuvend.
Mbledhja e komisionit, me drejtues Fatmir Xhafajn, vëllain e trafikantit të drogës Geron Xhafaj, është planifikuar të nisë në orën 09:30, teksa pritet konstituimi i tij. Mësohet se në mbledhje do të jetë e pranishme edhe kryetarja e Kuvendit Lindita Nikolla.
Komisioni ka në përbërjen e tij 11 anëtarë, 6 nga PS dhe 5 nga opozita, ku anëtarët do të jenë kryetarët dhe zv. kryetarët e 4 komisioneve të përhershme parlamentare dhe ata të Këshillit të Integrimit Evropian.
Më konkretisht nga ana e socialistëve janë Fatmir Xhafaj kryetar dhe anëtarë janë Klotida Bushka, Eduard Shalsi, Etilda Gjonaj, Evis Kushi dhe Toni Gogu.
Ndërsa nga opozita, sipas draftit ë miratuar në Kuvend, duhet të jenë Jorida Tabaku, Dhurata Tyli Çupi, Sorina Kote, Flutura Açka dhe një deputet tjetër.
Deri më tani opozita ka deklaruar se nuk do të bëhet pjesë e këtij komisioni të propozuar nga socialistët, ashtu siç kanë dëshmuar edhe dy votimet në Kuvend, teksa pritet të shihet se çfarë do të ndodhë në mbledhjen e nesërme.
Emri zyrtar i komisionit në fjalë është “Komisioni i Posaçëm i Kuvendit për Thellimin e Reformave për Mirëqeverisjen, Sundimin e Ligjit dhe Antikorrupsionin për Shqipërinë 2030 në Bashkimin Evropian”. Ndërkohë që opozita e ka interpretuar ngritjen e tij si një tentativë të kryeministrit Edi Rama për të vënën nën kontroll SPAK-un dhe GJKKO-në.
Komisioni i Posaçëm do të zhvillojë veprimtarinë e tij në një afat kohor 10 mujor. Në rast nevoje, me kërkesë të arsyetuar të komisionit, Kuvendi mund të vendosë zgjatjen e afatit të ushtrimit të veprimtarisë së komisionit.
Socialistët kanë 11 vite në Qeveri, teksa janë “të mbytur” në akuza për korrupsion dhe Shqipëria në çdo raport del si vendi më i korruptuar në Europë, teksa mazhoranca të kujtohet 1 vit para zgjedhjeve për të luftuar korrupsionin në vetëm 10 muaj.
