nalisti Andi Bushati tha në Mcn tv se i duket absurde teoria që ka pasur një pakt mes kryeministrit Edi Rama dhe liderit të opozitës Sali Berisha për t’i kaluar Rithemelimit vulën e PD.
Bushati vë në dukje se pavarësisht marrjes së vulës nga grupimi më i madh opozitar, Rama i ka rrëmbyer opozitës diçka tjetër, izolimin e Berishës.
“Nga pikëpamja formale ishte një vendim i papritur. Unë personalisht s’e pritja që vula do t’i jepej asaj që është realisht PD. E kam dëgjuar shumë teorinë e një pakti, por më duket diçka absurde. Ka shumë njerëz që e thonë këtë teori, dhe që i shkon përshtat pushtetit, që në fund të fundit Berisha dhe Rama janë bashkë. Por po të ishin bashkë Berisha s’do ishte i izoluar. Duke thënë që drejtësinë e ka Rama, atëherë edhe Berishën në burg e ka futur Rama, por a mund të bësh pakt me një njeri që të ka izoluar?! Ky vendim i Apelit është noterizim i vendimeve që dha Gjykata e Larta. Për çfarë shërbente rrëmbimi i vulës, apo mos çuarja te shumica? Shërbente për atë që pamë në zgjedhjet e 6 marsit dhe 14 majit, për ta çuar opozitën në përballje me pushtetin pa financa, pa kohë mediatike, për t’i kthyer drejtësinë dhe gjykatat në levë të pushtetit. Sot partia e Berishës do ketë edhe komisionerët, financimin, emrin e Berishës në listë, por do ketë liderin e vet të izoluar dhe do jetë fushata e parë elektorale ku lideri i opozitës nuk bën dot fushatë, pra Rama i ka dhënë një gjë, por i ka rrëmbyer diçka tjetër” – tha Bushati.
Analisti mendon se Basha, apo çdo faktor opozitar mund të vendosë kushte për bashkim në situatën që është sot PD-ja, ku i duhet një koalicion i madh për t’u përballur me Ramën.
“Unë mendoj se çdo faktor opozitar është në gjendje të vërë kushte, sepse aq vota sa ka sot opozita s’i mjaftojnë për t’u përballur me Ramën. Opozita është e dënuar ta rrisë pafundësisht trenin e koalicionit opozitar. Basha kishte 100 mijë vota në zgjedhjet e fundit, natyrisht ato janë edhe të siglës, kjo shifër do jetë më e vogël, por historikisht PD ka pasur një fraksion anti-Berishist, e mira do ishte që të ishin pjesë e një koalicioni të madh, duke mbledhur çdo faktor opozitar” – tha Bushati.
I pyetur se çfarë do të ndodhë nëse Berisha humbet mandatin e deputetit, Bushati tha:
“Nëse humbet mandatin s’humbet drejtimin e partisë. Me ç’po shoh unë Berisha vetëm i vdekur e lëshon atë pozicion. Unë s’besoj se do shkohet drejt djegies së mandatit, sepse politikisht do ishte pa sens. Të krijosh një kauzë që i jep Berishës një lloj viktimizimi për t’ia hequr 3 muaj mandatin s’do kishte kuptim. Ka zero shanse që t’i fitojë zgjedhjet sepse hyj te ata njerëz që mendojnë që ky regjim nuk shembet me votë”.
