Prokuroria e Fierit ka mbyllur hetimet dhe ka dërguar për gjykim 5 persona, të akuzuar për ‘shpërdorim detyre’ dhe ‘falsifikim dokumentesh’.
Për gjykim është dërguar P. V., në cilësinë e drejtorit të spitalit ‘Ihsan Çabej’ në Lushnjë, i akuzuar për veprën penale ‘shpërdorim detyre’, ndërsa personat Xh.B., J.Sh., K.L. dhe A.Sh., të akuzuar për veprën penale ‘Falsifikimi i dokumenteve’.
Drejtori i spitalit në vitin 2021, ka urdhër ndërtimin e shtesës së quajtur “ura lidhëse mes pavioneve të patologjisë dhe të infektivit” pa marrë leje ndërtimi nga organet kompetente, rrjedhimisht duke ndryshuar dhe ndryshuar destinacionin e fondit buxhetor të parashikuar për mbulimin e zbatimit të kontratës së mirëmbajtjes.
Në procesverbalet e hartuara për këto punime, janë dokumentuar më tepër punë të kryera sesa në realitet duke i dhënë përfitime në vlera monetare kompanisë së pajtuar për ndërtimin e projektit dhe duke i shkaktuar dëm ekonomik buxhetit të shtetit.
Të pandehurit Xh.B., J.Sh., K.L. në cilësinë e anëtarëve të komisionit të ndjekjes së zbatimit të kontratës së mirëmbajtjes, në hartimin e procesverbalit, kanë pashqyrtuar punime të kryera në pavionin e infektivit, që në fakt nuk janë kryer.
I pandehuri A.Sh. në cilësinë e drejtuesit teknik të shoqërisë dhe të inxhinierit zbatues të kontratës së mirëmbajtjes, në procesverbal ka pasqyruar punime të kryera në magazinën e oksigjenit dhe tek infektivi i vjetër, punimet e kryera në magazinën e oksigjenit dhe punimet e kryera në pavionin e infektivit; të cilat në fakt nuk janë kryer. Në bazë të këtij procesverbali është lëshuar dhe fatura për pagesën e shoqërisë së pajtuar.
“Nga hetimet e kryera mbi procedimin penal nr.831 të vitit 2021 u provua se:
– I pandehuri P.V., në cilësinë e drejtorit të Spitalit “Ihsan Çabej” Lushnjë, urdhëroi ndërtimin e shtesës së quajtur “ura lidhëse mes pavioneve të patologjisë dhe të infektivit” pa marrë leje ndërtimi nga organet kompetente, duke ndryshuar destinacionin e fondit buxhetor të parashikuar për mbulimin e zbatimit të kontratës së mirëmbajtjes nr.670/1, datë 05.06.2019, pa ndjekur procedurën përkatëse ligjore dhe duke shmangur kryerjen e procedurës së prokurimit publik. Gjithashtu, situacionet e punimeve që sipas këtij të pandehuri ishin kryer tek “ura lidhëse”, përmbajnë më shumë punime se ato të realizuara realisht, çka ka sjellë një përfitim të padrejtë për shoqërinë “D…” dhe dëm ekonomik për buxhetin e shtetit.
– Të pandehurit Xh.B., J.Sh., K.L. në cilësinë e anëtarëve të komisionit të ndjekjes së zbatimit të kontratës së mirëmbajtjes nr.670/1, datë 05.06.2019, kanë hartuar procesverbalin e datës 17.02.2021 mbi punimet e kryera në magazinën e oksigjenit si dhe procesverbalin e datës 30.04.2021 për punimet e kryera në pavionin e infektivit; asnjë prej të cilave në fakt nuk është kryer.
– I pandehuri A.Sh. në cilësinë e drejtuesit teknik të shoqërisë dhe të inxhinierit zbatues të kontratës së mirëmbajtjes nr.670/1, datë 05.06.2019, të lidhur nga shoqëria “D…” shpk, ka hartuar situacionin përfundimtar për punimet e kryera gjatë periudhës 03.01.2021 deri 25.05.2021, situacionet e punimeve të kryera në magazinën e oksigjenit dhe tek infektivi i vjetër, si dhe bashkë me komisionin e ngritur nga Spitali “Ihsan Çabej” Lushnjë, kanë hartuar procesverbalin e datës 17.02.2021 mbi punimet e kryera në magazinën e oksigjenit si dhe procesverbalin e datës 30.04.2021 për punimet e kryera në pavionin e infektivit; të cilat në fakt nuk janë kryer. Mbi bazën e këtyre situacioneve dhe procesverbaleve ka dalë edhe urdhri i shpenzimit nr.711, datë 29.12.2021, për pagesën e shoqërisë “D…” shpk.”– thuhet në njoftimin e Prokurorisë.
