Në një situatë të tensionuar është zhvilluar edhe protesta e sotme e opozitës para bashkisë së Tiranës ku qytetarët kanë kërkuar dorëheqjen e kryebashkiakut socialit Erion Veliajt pas aferës “5D” ku drejtorët e emëruar prej tij kanë përfunduar në burg për vjedhjen e miliona eurove.
Ashtu si herët e tjera, protestuesit fillimisht kanë qëlluar me vezë dhe mollë në drejtim të bashkisë së skandaleve e cila me urdhër të Veliajt ishte blinduar nga gardhi metalik dhe dhjetëra forca policie dhe skafandra.
Pas fjalës së Këlliçit, situata u tensionua me qytetarët që fillimisht hodhën benzinë dhe i vendosën flakën gomave të makinës. Menjëherë ndërhyn policia e cila shuan flakët pas disa tentativave të protestuesve.
Protestuesit kanë shkulur edhe gardhin metalik, ndërsa kanë hehdur sende të forta drejt policisë. Efektivët janë përgjigjur me spraj lotësjellës.
FOTO-GALERI nga situata e tensionuar në protestën e bashkisë së Tiranës:
- Klevis Balliu dëmtohet nga gazi lotsjellës
Shefi i Organizimit në Partinë Demokratike, Klevis Balliu është dëmtuar si pasojëe gazit lotsjellës së hedhur nga bashkia për shpërndarjen e protestuesve.
Tensionet mes efektivëve dhe protestuesve ka nisur pasi këta të fundit i vunë zjarrin gomave para kordonit policor.
- Lëndohet edhe një efektiv policie
Një efektiv policie është lënduar si pasojë e tensioneve në protestën e opozitës para Bashkisë Tiranë.
Siç mund ta shihni nga pamjet, efektivi është lënduar pasi protestuesit e kanë goditur me shishe në fytyrë.
Efektivi është ndihmuar nga kolegët duke u larguar nga gardhi i vendosur mes protestuesve dhe godinës.
- Protestuesit “arrestojnë” Erion Veliajn
Në mungesë të reagimit nga SPAK për vjedhjet e miliona eurove që kryhen çdo ditë nga bashkia e Tiranës, sot protestuesit kanë veshur një dordolec si Erion Veliaj të cilin e kanë prangosur pas skandaleve të shumta korruptive.
Pavarësisht aferës së inceneratorit të Tiranës dhe mega skandalit “5D” këto nuk kanë mjaftuar që Prokuroria e Posaçme të marrë si të pandehur kryebashkiakun socialist Erion Veliajn.
Protestuesit dordolecit i kanë vënë prangat dhe e kanë hedhur në një kosh plehrash.
- Këlliçi: ‘Gjobaxhiu’ i Bashkisë së Tiranës padit AMT për prishjen e fasadës së hajdutit Veliaj
Anëtari i Kryesisë së PD-së Belind Këlliçi, gjatë fjalës së tij në protestën e ditës së sotme para Bashkisë Tiranës, ka denoncuar kreun e Agjencinë e Mbrojtjes së Konsumatorit Arli Naska.
Këlliçi tha se Naska, merr kurajën me një akt të turpshëm të gjobisë Aleancën për Mbrojtjen e Teatrit dhe avokaten e Aleancës, Adriana Kalaja.
“Këtë javë kemi parë një hajdut tjetër të ngrejë kokën. Ndërkohë qe ne prisnim të gjithë si qytetarë të Tiranës, një shenjë falënderimi për Aleancën për Mbrojtjen e Teatrit, që vijon thuajse prej shtatë vitesh një protestë për një kauzë të drejtë, për teatrin që të ngrihet aty ku ishte edhe ashtu siç ishte, dhe Aleanca vijon të protestojë për kauzë qytetare, çfarë ndodhi?!
Këtë javë, hajduti më i pasur në bashkinë e Tiranës, gjobaxhiu Nr. 1 i bashkisë së Tiranës, Arli Naska, ish-drejtor i Tatimeve në bashkinë Tiranë, aktualisht drejtor në Agjencinë e Mbrojtjes së Konsumatorit, merr kurajën me një akt të turpshëm të gjobisë Aleancën për Mbrojtjen e Teatrit dhe avokaten e Aleancës, Adriana Kalaja. Dhe për çfarë?! Se qenka prishur godina e fasadës së hajdutit që quhet Erion Veliaj!
Janë shqetësuar dhe kanë vendosur një gjobë 300 mijë lekë ndaj Aleancës dhe nuk shqetësohet Arli Naska dhe Erion Veliaj se janë vjedhur 132 milionë euro te inceneratori i Tiranës dhe të paktën, përmes 45 tenderave, 30 milionë euro me bandën 5D”, tha Këlliçi.
- Teliti: Shqiptarët nuk pranojnë instalimin e diktaturës
Gjatë fjalës së tij në protestën e ditës së sotme para Bashkisë Tiranë, nënkryetari i Këshillit Bashkiak, Dorian Teliti, tha se demokratët dhe shqiptarët nuk pranojnë instalimin e diktaturës.
Teliti theksoi se vetëm me protesta të qëndrueshme arrihet qëllimi madhor, ndryshimi i pushtetit.
“Në këtë protestë të 11 ne kemi treguar diçka, që ne nuk dorëzohemi. Nuk dorëzohemi as para gardheve policore, as ndaj presioneve, as nga skafandrat që po afrohen tani, as nga dyqanet mediatike të blera.
Nuk dorëzohemi sepse ne jemi me të drejtën, qyterarët. Nuk dorëzohemi deri ditën që ata që kanë vjedhur e po shkatërrojnë Tiranën e Shqipërinë të dalin para drejtësisë dhe të marrin dënimin e merituar. E ardhmja jonë dhe e fëmijëve tanë qëndron në shpresën e vetme për ta kthyer Tiranën dhe Shqipërinë në shinat e demokracisë.
Diktaturën e kanë parë dhe jetuar prindërit tanë. E kanë parë dhe jetuar edhe shumë prej nesh, ndonëse në moshë të re.
Diktaturën ne nuk e pranojmë dhe çdo qëllim i mazhorancës aktuale në nivel qendror dhe lokal për të instaluar diktaturën në Tiranë dhe Shqipëri do të marrin përgjigjen e merituar atë të shqiptarëve të bashkuar, sepse vetëm të bashkua ne do të ja dalim.
Qëllimi i ndryshimit të madh, arrihet vetëm me protestë të qëndrueshme, periodike, pa kthim pas dhe protestë gjithnjë e më të shumtë.
Prandaj të gjithë ne duhet të vazhdojmë të qëndrojmë më të bindur se kurrë se jemi në anën e të drejtës dhe përgjegjësia është në supet tona, përgjegjësia për ta bërë Tiranën një qytet normal dhe të jetueshëm’, tha gjatë fjalës së tij”, Dorian Teliti.
- Neritan Liçaj: Këta të bashkisë së Veliajt janë miliarderë
Aktori i njohur Neritan Liçaj, në fjalën e tij nga protesta e thirrur nga Alenca për Mbrojtjejn e Teatrit para Bashkisë Tiranë në lidhje me dosjen “5D”, u shpreh se kjo mazhiorancë po hedh në erë tempujt e njeriut, që janë galeritë, teatrot, muzetë, bibliotekat etj.
“Çfarë bëri Cjapi i Surrelit?! Cjapi i Surrelit do të marrë tokën e dhuruar nga rilindasit e vërtetë për të pasuruar veten e vet! Domethënë, në qoftë se rilindasit e vërtetë shqiptarë u përpoqën dhe shkrinë pasuritë e tyre familjare për të bërë këtë komb, të vjen Cjapi i Surrelit me këtë “qitësin” e vogël dhe vjedh pasuritë tona kombëtare për të pasuruar firmën Fusha.
Dhe mua më habit dhe ky biznesmeni Fusha: a një çikë moral ky njeri, mor burrë? A është ndonjëçikë tirans?! A është një çik shqiptar?! Se është turp ta marrë atë për të bërë biznes. Ka një limit! Ka një kufi çdo gjë.
E dyta që doja të thosha, paraardhësit e këtyre, Beqir Ballukërat e ku di gjë unë e gjithë çfarë janë, ish-ministri juaj, Çuçi i Sigurimit… se ne të gjithë çunat e Tiranës u futëm kush në arte, kush në arkeologji, arkitekturë, ky Çuçi – në Sigurimin e Shtetit! Nejse, ç’rëndësi ka, punë e tij… Këta shembën tempujt e zotave! Hodhën kishat, xhamitë, teqetë, në erë! Duke na mallkuar si komb, ata.
Tani, këta “kingat”, pasardhësit e tyre, po hedhin në erë tempujt e njeriut, që janë galeritë, teatrot, muzetë, bibliotekat etj, etj. tani, bëjeni llogarinë vetë se sa të korruptuar janë këta njerëz së brendshmi, se në para janë miliarderë!”, tha Liçaj.
