Eksperti për çështjet ekonomike dhe anëtari i ‘Nismës Thurjes’ Pano Soko, ka deklaruar se nuk i duket aspak normale bllokimi i kërkesës së opozitës për zhvillimin e një mocioni me debat në sallën e Kuvendit.
Soko tha se nëse gjithçka në Kuvend do të hidhet në votim, atëherë pse mbajmë opozitë ne në Parlament.
“Nuk ka kuptim që gjithçka hidhet në votim, atëherë përse të na duhet opozita? Mënyra se si po veprohet është kalimi nga demokracia në diktaturë, pra me forcën e kartonit kjo mazhorancë rrëzon gjithçka.
Zgjidhja nuk është largimi i opozitës nga Kuvendi, pasi Edi Rama atë pret, atë do, pasi ai duke mos pasur opozitën në Kuvend, ka miratuar ligjet, ka kaluar buxhetin pa asnjë debat”, tha Soko.
Ai tha se është kundër mënyrës se si kjo mazhorancë ka zgjedhur të rrëzojë gjithçka që propozon opozita, duke nisur nga Komisionet Hetimore dhe deri te këto kërkesat me debat.
