Anëtari i Kryesisë së Rithemelimit të PD, Eno Bozdo, është shprehur se ardhja e emigrantëve afrikanë në Shqipëri, në bazë të marrëveshjes mes kryeministrave Edi Rama dhe Giorgia Meloni, do të sjellë probleme shumë të mëdha për vendin tonë.
Komentet Bozdo i bëri në emisionin “Now me Erla Mëhillin” në Euronews Albania, ku tha se përshtatja e popullatës afrikane me vendasit do të sjellë probleme të cilat vendi ynë e ka të vështirë t’i përballojë.
Ai tha gjithashtu se Shqipëria ka hapur një portë për emigrantët pa ia kërkuar askush, por vetëm për një favor ndaj Italisë.
“Vendimi i GJK e detyron qeverinë shqiptare nesër të fillojë të shpenzojë dhe buxhetojë, por problemi i parave që dalin nga buxheti i shtetit është problem, por nuk është ky problemi më i madh. Emigrantët afrikanë në tokën shqiptare do të jenë edhe problem social, jo vetëm për sot, por edhe për dekadat që vijnë.
Problemi që ka sot Europa dhe nesër Shqipëria në Europë është problemi i emigracionit. Ne kemi hapur portën pa na i kërkuar kërkush. Vetëm për një favor. E ka kërkuar Italia për interesat e saj. Kryeministrja italiane ka gjithë të drejtën të kërkojë këtë gjë. Për Shqipërinë minimalisht një kryeministër serioz, këtu duhej një diskutim shumë i gjerë për këtë marrëveshje.
Vende shumë më të zhvilluara të BE-së dhe më të mëdha nuk e përballojnë dot këtë. Ndërveprimi i atij kampi me popullatën vendase do të sjellë probleme të tjera. Edhe sikur të na ishte kërkuar me forcë të madhe, duhet të ishim menduar 2-3 herë ta hapnim këtë derë apo jo”, tha Bozdo.
