Mjeku Gjovalin Bushi ka dhënë detaje për gjendjen shëndetësore të avokatit Sokol Mëngjesi i cili u dhunua në mënyrë brutale nga tre persona mëngjesin e djeshëm në zonën e ish-Bllokut në Tiranë.
Mjeku ka deklaruar se avokati Mëngjesi ndodhet në gjendje të rëndë, ku përveç dëmtimeve kockore në kokë, pa probleme edhe në tru. Gjithashtu, ai bëri me dije se avokatit i është bërë një ndërhyrje nga një neurokirurg, teksa sipas tij, duhet të presin dhe 72 orë nëse do të ketë reagim apo jo.
“Avokati u shfaq me një traume koke. Në momentet e para ishte koshient, me kalimin e kohës çdo gjë filloj të rëndohej. Ishte shumë i axhituar dhe më pas filloi të humbiste dhe koshiencën. Në këto kushte vendosëm që pacienti të intubohej. Nga momenti i djeshëm deri sot gjendja pothuajse është stabël, megjithëse vazhdon të jetë në gjendje të rëndë. Është bërë një ndërhyrje nga neurokirurgët, dhe sot është evidentuar një rënie e edemës, dhe në këto kushte nuk ka nevojë për ndërhyrje urgjente kirurgjikale. Nga parametrat është normale, por pritet si do reagojë në orët më vonë. Presim 72 orë. Urojmë që gjendja të jetë stabël që të fillojmë ta zgjojmë. Ka pasur dhe një shtypje të pjesës së përparme të trurit dhe pacienti ishte shumë i axhituar, u shtua ënjta e trurit dhe nisi të binte koshienca dhe në këto kushte u detyruam ta intubonim.”, – është shprehur Bushi.
Organizatori i sulmit ndaj avokatit Sokol Mëngjesi, sipas hetimeve është shtetasi Dritan Nano, për shkak se nuk pranonte t’i përmbahej kontratës me avokatin për një proces gjyqësor të fituar për një pronë.
Avokati Sokol Mëngjesi u dhunua nga Dorian Alia, Elton Kasaj dhe Drivaldo Aliaj, ndërsa Romario Tabaku ka siguruar largimin e tre dhunuesve nga vendngjarja. Deri më tani është vetëdorëzuar në polici vetëm Dorian Alia.
