Avokatët e Sali Berishës, Genc Gjokutaj dhe Sokol Mëngjesi, kanë deklaruar se procesi gjyqësor ndaj kryedemokratit dhe dhëndrit të tij, Jamarbër Malltezi për privatizimin e ish klubit Partizani është politik.
Në një konferencë për mediat, ata kanë deklaruar se masat e sigurimit personal ndaj Berishës dhe dhëndrit të tij janë vendosur pa u marrë në pyetje dhe se pas ndryshimit të destinacionit të klubit nga sportive në zonë banimi është bërë sipas tyre nga Edi Rama, kur asokohe ishte kryetar bashkie i Tiranës.
Sipas avokatit Sokol Mëngjesi, procesi është politik, ndërsa shton se SPAK e regjistroi kallëzimin penal në të njëjtën ditë kur u bë kallëzimi më 1.12.2020.
“Ky proces është politik për arsye se ky proces është depozituar kallëzimi që në 1.12.2020 dhe po në të njëjtën datë SPAK e ka regjistruar si procedim penal. Kallëzimi pavarësisht se është i rremë, ka pasur emra konkretë në kallëzim por SPAK nuk ka regjistruar asnjë emër personi për të shkelur të drejtat kushtetuese dhe marrjen në pyetje gjatë hetimeve paraprake. SPAK ka tejkaluar kompetencën e vet se neni 287, pastrimi i produkteve të veprës penale nuk është në kompetencë të SPAK se nuk kishte funksionar të lartë si të dyshuar. SPAK ka mbajtur mbi dy tre vjet në hetime pa emra personazh konkretë. Berishës dhe Maltezi i janë caktuar masat e sigurimit pa u pyetur asnjëherë nga SPAK. Një nga pikat më thelbësore në këtë çështje janë ndryshimi i destinacionit të klubit Partizani, i bërë nga kryeministri Edi Rama, atëherë kryetar bashkie, në vitet 2004, 2006 dhe 2008 me izolimin funksional të planit të përgjithshëm të Tiranës. E vetmja pikë ku SPAK akuzon Berishën është se ka qenë kryetar i KRRTRSH, por asnjëherë nuk ka marrë ndonjë vendim pa i vajtur nga KKT i bashkive”, u shpreh avoakti Mëngjesi.
