Me 76 vota pro, Kuvendi ka miratuar rezolutën e propozuar nga Partia Socialiste për thellimin e reformave për mirëqeverisjen, sundimin e ligjit dhe luftën kundër korrupsionit për Shqipërinë 2030 në Bashkimin Europian. Opozita nuk mori pjesë në votim.
Anëtari i Kryesisë së Rithemelimi, Enno Bozdo, i ftuar në emisionin ‘5 Pyetje nga Babaramo’ në Report Tv e cilësoi rezolutën si makijazh, në një kohë kur qeveria është një qeveri e korruptuar.
‘As korrupsioni dhe as drejtësia as nuk luftohen me projekt rezoluta dhe as nuk ndihmohen me projekt rezoluta por duhen akte konkrete. Ata që propozon Edi Rama kabineti i tij janë të damkosur në dekadën e tmerrshme të turpit që ata e quajnë korrupsion. Cilësimi korrupsion nuk ka më sens. Këtu kemi të bëjmë me një skenë të madh të grabitjes së pasurisë publike. Grabitësit sot erdhën dhe u zotuan se sot e tutje do të luftojnë korrupsionin. I kërkohet opozitës të votohet rezoluta dhe këto janë grabitësit më të mëdhenj. E gjitha kjo nuk mundë të konceptohet që PD t’i shkojë mbrapa një rezolute të tillë. Është një makijazh sa për të thënë që bëmë dhe këtë që bëmë.’- tha Bozdo.
Nga ana tjetër avokati Sokol Hazizaj, tha për gazetarin Ilir Babaramo se komisioni anti-korrupsion ka afat 15 muaj, duke kaluar edhe ekzistencën e Kuvendit.
‘Çdo gjë bëhet në emër të dialogut politik. Ajo që më duket e tepërt është se krijohet një komision që prevalon mbi komisionet e tjera parlamentare. Duke sjellë në vështrime të përgjithshme pakufizuara autoritetin e këtij komisionit me duket sikur prishen radhët brenda administrimit që ka vetë qeveria. Koha e ekzistencës dhe funksionimi i komisionit është jo më shumë se 15 muaj. Kufiri 15 muaj kalon kohën e ekzistencës së këtij kuvendi. Kjo ma deformon idenë e mirë e të qenit të një komisioni në mbështetje të drejtësisë.’- tha Hazizaj.
Kreu i ‘Nismës Thurje’ Endri Shabani tha se qëllimi afatgjatë është që të ndryshojë kushtetutën dhe të pezullojë punën e SPAK.
Është dramë me një akt në këtë pikë nuk ka asnjë lloj influence. Aktet e tjera nuk do të luhen vetëm nga Rama. Qëllim afatgjatë është të ndryshojë Kushtetutën dhe të pezullojë punën e SPAK. Kush është qëllimi gjithë kësaj pse tani dhe pse duhen ndryshime ligjore. Reforma në drejtësi ka shkelur në territore që deri tani nuk kishte shkelur për 30 vjet. Pse tani. E dyta pse duhet me ligj?!’- u shpreh Shabani.
