Këshilli i Lartë i Prokurorisë ka vendosur me 9 vota pro ndërprerjen e mandatit të Alfred Ballës në këtë institucion, pas vendimit të vetingut që e përjashtoi me 15 vite nga sistemi i drejtësisë. E vetmja që ka votuar kundër ka qenë Nurihan Seiti.
Alfred Balla është zgjedhur në vitin 2018 si anëtar i KLP-së, dhe në mars të 2022, u zgjodh në krye të “qeverisë së prokurorëve” me një mandat dy vjeçar. Ndërkohë, mandati tij si anëtar ka përfunduar që prej dhjetorit të vitit të kaluar, por procedurat për përzgjedhjen e 3 kandidatëve jo magjistratë u zgjatën përtej afateve.
Me vendim të Kolegjit të Posaçëm të Apelimit (KPA) më 21 Maj, Alfred Balla u përjashtu për 15 vite nga sistemi i drejtësisë, e për pasojë “nuk mund të emërohet gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm”.
Ky vendim u mor për shkak se në vitin 2017, kur nisi procesi i vetingut, Alfred Balla mbante statusin e ndihmësit-ligjor në Gjykatën e Lartë.
Pavarësisht vendimit të vetingut, Alfred Balla pretendonte se statusi i tij aktual në KLP ishte si i zgjedhur nga Kuvendi nga radhët e shoqërisë civile dhe jo si magjistrat. Sipas tij, për këtë shkak , ai pretendon se duhet ta ushtrojë ende detyrën në KLP.
“Unë jam anëtar i KLP-së i zgjedhur nga Kuvendi prej përfaqësuesve të shoqërisë civile shqiptare…Nga interpretimi i nenit 149/b të Kushtetutës nuk del e qartë se, në lidhje me vazhdimin e qëndrimit në detyrë, tashmë duhet të shprehet ky Këshill, apo organi i emërtesës sime që është Kuvendi i Shqipërisë, apo Gjykata Kushtetuese?”, shkruante Balla në një letër drejtuar KLP-së, teksa nuk ishte i pranishëm në mbledhjen e sotme.
LEXO EDHE: Mandati i kryetarit/ Britma e ofendime, KLP tregon “derexhenë” e “Drejtësisë së Re”
Ndërkohë, mbledhja e sotme e KLP-së është shpqëruar me debate të forta mes zv.kryetarit Tartar Bazaj, i cili drejtonte mbledhjen dhe anëtares Nurihan Seiti, e cila që në krye të seancës mbajti qëndrimin se KLP nuk duhet të shkarkonte Alfred Ballën.
Seiti dha një argument disi të pakuptueshëm, kur e nisi fjalën e saj me qëndrimin se ajo vetë, si edhe Alfred Balla e zv.kryetari Tartar Bazaj, kanë përfunduar mandatin 5-vjeçar në dhjetor 2023 dhe për këtë arsye nuk duhet të ishin fare në mbledhje.
Por, megjithëse pretendoi se edhe ajo vetë nuk duhet të ishte në detyra, anëtarja Seiti vijoi më tej, duke u shprehur se vendimi i KPA-së nuk ka efekt mbi Alfred Ballën, pasi ai nuk e kishte statusin e ndihmës-ligjorit, pra rrjedhimisht as atë të subjektit të Vetingut, pasi ishte zgjedhur në Këshillin e Lartë të Prokurorisë nga radhët e shoqërisë civile.
Ky argument i rrëmujshëm i Seitit nxiti anëtarin tjetër, Sokol Stojani, që, duke lexuar bazën ligjore, tentoi t’i jepte një drejtim normal rrjedhës së diskutimit.
Por, qëndrimi i Stojanit nuk ishte aspak sqarues për Nurihan Seitin, e cila rimori fjalën me tone të ashpra, duke u përplasur shpesh me drejtuesin e seancës dhe njëkohësisht zv.kryetarin e KLP-së, Tartar Bazaj.
Për shkak të debateve të forta, mbledhja u ndërpre dhe rinisi pasdite, ku u mor dhe vendimi për ndërprerjen e mandatit të Alfred Ballës në Këshillin e Lartë të Prokurorisë, i cili duhet të ishte larguar vetë nga detyra, pas shkarkimit nga KPA.
Mandati i kryetarit/ Britma e ofendime, KLP tregon “derexhenë” e “Drejtësisë së Re”
