Nga Boldnews.al
Një 53-vjeçar, i identifikuar si Ardian Fejzullahi, ka humbur jetën mëngjesin e të Hënës, pasi ka rënë nga skelat e katit të shtatë të një pallati në ndërtim, në rrugën “Aleksandër Mosiu”, në Tiranë.
Sipas dëshmive nga vendi i ngjarjes, i riu ishte duke ngjitur kova me llaç në godinë, kur është rrëzuar, në rrethana ende të paqarta. Policia ka shoqëruar drejtuesin teknik të punimeve, ndërkohë që po kryhen të gjithë veprimet e tjera proceduriale.
“Boldnews.al” mëson se godina shumë-katëshe po ndërtohet nga kompania “Andi Konstruksion”, bazuar në një leje të miratuar nga kryetari i Bashkisë së Tiranës, Erion Veliaj, në qershor të vitit 2023.
Kompania ndërtuese është aktive që prej vitit 1995. Ajo është në pronësi të biznesmenit Lefter Miha.
Ai është gjithashtu nënkryetar i Shoqatës së Ndërtuesve. Miha ka mbajtur, në përgjithësi, një profil të ulët publik dhe shfaqjet e tij në media kanë qenë të pakta.
Në një daljet e tij të rralla, Miha ka dhënë opinion mbi situatën e ndërtimeve pa leje në Tiranë, sidomos pas nisjes së zbatimit të Aktit Normativ qeveritar për konfiskimin e kateve pa leje.
Në një prononcim për agjencinë BIRN, të dhënë rreth një muaj më parë, ndërtuesi Latif Miha shprehej se “Për ne që jemi totalisht të rregullt, nuk është se po na shqetëson në çmime, por vetëm që kemi marrë njollë nga ata ndërtues totalisht të pandershëm,” tha Latif Miha, nënkryetar i Shoqatës së Ndërtuesve.
Për momentin është e paqartë se çfarë ndodhi me 53-vjeçarin Fejzullai dhe përse ai u rrëzua tragjikisht nga kati i shtatë. Dyshimet e para bien mbi mungesën e zbatimit të rregullave teknike.
Policia e Shtetit, në njoftimin e saj, nuk ka dhënë detaje të shumta mbi ngjarjen dhe as se cila ishte kompania apo personat përgjegjës për aksidentin e rëndë në punë, i cili, i shtohet radhës së aksidenteve tragjike në sektorin e ndërtimit.
Rreth dy javë më parë, dy persona humbën jetën, pasi u rrëzuan nga dy godina në ndërtim, në qytetin e Lezhës.
Ndërkohë, edhe më herët ka pasur aksidente me pasoja të rënda të humbjes së jetës. Në çdo rast, policia ka shoqërua, arrestuar apo shpallur në kërkim ndërtuesit ose personat përgjegjës për sigurinë në ndërtime, por ndërkohë ende nuk ka asnjë plan ndër-institucional për të eleminuar këto ngjarje tragjike, të cilat po kthehen në “rutinore”, pasi veprimet inspektuese janë thuajse inekzistente.
