Gjykata e Posaçme kundër Korrupsionit dhe Krimit të Organizuar ka rrëzuar kërkesën e kreut të PD-së Sali Berisha dhe dhëndrit të tij, Jamarbër Malltezit për revokimin e masës së sigurisë në lidhje me çështjen e privatizimit të ish-kompleksit “Partizani”
Në seancën e sotme, prokurorët e SPAK kanë paraqitur pretendimin se lideri demokrat Sali Berisha ka shkelur masën e sigurisë “arrest në shtëpi” duke futur në banesë dhe kontaktuar me ish-eurodeputetin gjerman Elmar Brok dhe gazetarët italianë të RAI 3.
Për këtë pretendim, SPAK-u iu është referuar raportimeve mediatike, teksa Elmar Brok mbajti fjalim nga dritarja e banesës së Sali Berishës në tubimin e 14 Majit, ndërsa intervistën për emisionin Report në RAI 3, nuk dihet saktësisht data se kur e ka dhënë.
Gjithashtu sipas prokuroreve të SPAK, Sali Berisha ka futur dhe mjete teknike në banesë dhe me këto fakte prokurorët kërkuan të rrëzohet kërkesa për revokim mase. Vendimi është marrë nga gjyqtarja Irena Gjoka.
Ndërkohë avokati i Berishës, Genc Gjokutaj, në një prononcim për mediat jashtë SPAK-ut, i ka konsideruar pretendimet e prokurorëve si lajthitje, pasi masa e sigurisë ndaj Berishës, nuk afekton në aktivitetin e ish-kryeministrit.
“Berisha ka që në 30 dhjetor në arrest në shtëpi. Kjo është lajthitje e SPAK dhe gjykatës kundër krimit të organizuar. Vendimi është i tillë që arresti në shtëpi nuk afekton aktivitetin e liderit të opozitës” ,tha Gjokutaj.
Vlen të theksohet fakti se GJKKO nuk ka pranuar as kërkesën e avokatëve të Sali Berishës për përjashtimin e gjyqtares Irena Gjoka alias Maneku alias Shpata. Për këtë të fundit, mediat greke publikuan vendimin e Gjykatës së Athinës ku vërtetohej se ishte dëbuar nga vendi fqinj në vitin 2002 për shkak se kishte përdorur një vizë të falsifikuar dhe për këtë shkak iu ndalua hyrja për 12 vite në vendet e zonës Shengen.
Avokati i Berishës deklaroi se ky fakt tashmë nuk mohohet as nga Irena Gjoka, por pretendohet se nuk ndikon për të marrë vendimin për përjashtimin e saj.
“Sot kemi marrë një kopje të vendimit të kësaj gjykatë për rrëzimin e kërkesës tonë për përjashtimin e gjyqtares Irena Gjoka. Në bazë të ligjit kjo gjyqtare ka bërë një relacion dhe është interesant fakti që në relacionin e saj nuk e konteston ekzistencën e faktit se ajo është dënuar nga Gjykata Administrative me ndalimin në zonën Shengen, por thotë që pretendimet e mbrojtjes nuk hyjnë në shkaqet që sjellin përjashtimin tim. Gjykata thotë se kjo gjykatë nuk është kompetente për të gjykuar mbarimin ose jo të mandatit. Këto janë teknikalitete. Ata nuk duan të hyjnë në thelbin e çështjes, qoftë për përjashtim qoftë për marrjen e provave. Kërkesën për përjashtim ja kemi qepur në pallto do ja qepim edhe në këtë kostumin veror” – tha gjithashtu Gjokutaj për mediat.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta. Mbi këta dy të fundit rëndojnë akuzat për veprat penale “Korrupsioni pasiv i funksionareve te larte shtetërore ose te zgjedhurve vendore”, kryer në bashkëpunim dhe “Pastrimi i produkteve te veprës penale ose veprimtarisë kriminale”.
