Policia e Kosovës ka konfirmuar se Enver Sekiraqa është arratisur dhe nuk ka asnjë gjurmë prej tij, pas ndryshimit të masës së sigurisë, pasi Gjykata e Apelit në Prishtinë ka vendosur që ta rikthenete në burg.
Ai u dënua përfundimisht më 3 Maj të këtij viti me 25 vjet burgim, pas një sage të gjatë me drejtësinë, teksa akuzohet për vrasjen e Triumf Rizës, krim ky i ndodhur më 30 gusht të vitit 2007.
Për këtë ngjarje është dënuar me 35 vjet burg dhe Arben Berisha. Të dyja grupet ishin përplasur në “Swiss Casino” që në dhjetorin e vitit 2006. Të përfshirë ishin Enver Sekiraqa dhe disa shoqërues të tij në njërën anë dhe Triumf Riza e Arben Selmani në anën tjetër.
Në këtë incident mbeti i plagosur rëndë Arben Selmani. Prokuroria dyshon se ky ishte shkaku që çoi më pas në vrasjen e Triumf Rizës, i dashuri i asaj kohe i këngëtares Adelina Ismalili.
Në prill të vitit 2014, Prokuroria Speciale ngriti aktakuzë ndaj Enver Sekiraqës për tri vepra penale, për nxitje në vrasjen e Triumf Rizës, “detyrim” dhe “dhunim”, ku për këtë të fundit, gjykata e shkallës së parë e kishte shpallur të pafajshëm.
Në 17 maj 2016, Sekiraqa u dënua me 37 vite burg. Gjykata e Apelit më 6 mars 2020 vendosi të aprovojë kërkesën e mbrojtjes së Sekiraqës duke e kthyer rastin për të dytën herë në rigjykim. Më 3 maj 2024 Sekiraqa u dënua përfundimisht me 25 vite burgim.
Megjithatë ai tashmë nuk gjendjet dhe këtë e ka konfirmuar edhe policia e Kosovës, teksa ka ndërmarrë të gjitha masat për informim dhe ndalim në të gjitha vendkalimet kufitare ndaj Enver Sekiraqës..
Lidhur me rastin ka reaguar edhe avokatja e tij, Kosovare Kelmendi e cila tha se kjo nuk ishte “arratisje” pasi klienti i saj ka qenë “i lirë” deri tani dhe nuk ka qenë i detyruar të presë vendimin në shtëpi.
