Mbi 40 urdhër-arreste janë lëshuar nga SPAK dhe firmosur nga GJKKO për personazhet e njohur të botës së krimit në vend, pas zbardhjes së bisedave në aplikacionin “Sky Ecc”.
Policia e Shtetit në bashkëpunim me FNSH-në, RENA-n dhe forcat Operacionale ka ndërmarrë një aksion që prej orës 03:00 të mëngjesit të sotëm për të ekzekutuar masat e arrestit, duke ushtruar kontrolle në disa prej qyeteve të vendit: Tiranë, Vlorë, Durrës, Lezhë, Shijak, Kurbin, Nikël, etj.
Mësohet se SPAK ka lëshuar urdhër-arresti për dy vëllezërit Leonard dhe Erlis Duka, të cilët njihen si rivalë të Ervis Martinajt, teksa akuzohen dhe si porositësit e vrasjes së Santiago Malkos. Urdhër-arresti i ri është lëshuar edhe për Fatmir Hysenin nga Vlora, i cili me nofkën “Doçja”, i cili dyshohet dhe si ekzekutori i Santiago Malkos, si dhe në kërkim edhe për atentatin ndaj Inez Hajrullës.
RENA ka ushtruar kontrolle edhe në Shijak ku janë lëshuar urdhër-arresti për dy vëllezërit Astrit dhe Altin Avdylaj, si dhe për kushëririn e tyre Aldo Avdylaj. Po ashtu GJKKO ka firmosur urdhër-arrest edhe për “të fortit” e Niklës, dy vëllezërit Valter dhe Durim Bami, të cilët pas atentateve të fundit në zonën e tyre, janë shpërngulur në Dubai.
Po ashtu, SPAK ka lëshuar urdhër-arresti të ri dhe për dy anëtarët e bandës së Durrësit, Plaurent Dervishaj (kunati i Lulzim Berishës) dhe Indrit Dokle. Edhe këta të dy dyshohet se ndodhen në Emiratet e Bashkuara Arabe.
SPAK ka lëshuar urdhër-arresti edhe për ish-deputetin e PS-së, Arben Ndoka dhe vëllain e tij, Xhevi Ndoka. Arben Ndoka, të cilit më herët i janë sekuestruar pasuritë, nujk ndodhej në banesë dhe është shpallur në kërkim.
Forcat RENEA kanë zbarkuar edhe në Shkozet, ku kanë ushtruar kontrolle edhe në banesën e të fortit të kësaj zone, Ervis Doçi, i njohur ndryshe si “Visi i Pojës”.
Ndërkohë, me urdhër të SPAK, uniformat blu kanë arrestuar edhe biznesmenin nga Velipoja, Mir Bruli, një njeri i afërt i Pëllumb Gjokës, i arrestuar më herët nga SPAK. Mir Bruli është i njohur për bizneset në plazhin e Velipojës, lokale, restorante dhe hoteleri, teksa pak kohë më parë IKMT i shembi një objekt të ndërtuar pa leje në këtë zonë.
Gjithashtu, mësohet se Policia ka arrestuar në operacionin e sotëm edhe shtetasit Armando Ndreca dhe Elvis Ndreca, përkatësisht vëllai i deputetit Eduard Ndreca dhe djali i xhaxhait të ligjvënësit socialist. Armando Ndreca u arrestua më 13 Prill, pas zbulimit të një ferme kanabisi brenda një stani në Lezhë, por gjykata e këtij qyteti e liroi pas tre ditësh.
Burime bëjnë me dije se urdhër-arrestet e SPAK janë firmosur nga dy prokurorët Alfred Shehu dhe Altin Dumani. Po të njëjtat burime bëjnë me dije se nga bisedat në aplikacionin “Sky Ecc” janë zbardhur atentati ndaj Bardhok Pllanajt në Shkodër, i njohur si “Kumbari” dhe për atentatin e mbetur në tentativë ndaj Taulant Pepës.
Gjithashtu, janë zbardhur dhe vrasja e njërëzve të afërt të Ervis Martinajt, ku shkaku ka qenë përplasja për lojërat e fatit. Po ashtu, është zbardhur edhe përplasja mes vëllezërve Bami dhe Avdyajve, të cilët më herët kanë qenë miq dhe kanë pasur relata të mira dhe më pas u kthyen në armiq e rivalë të njëri-tjetrit.
Nga kontrollet e ushtruara në banesa, Policia ka sekustruar sjhuma të mëdha parash si dhe flori.
