Është zbuluar identiteti i 40-vjeçarit që terrorizoi fëmijët e tij gjatë natës së kaluar tek Shkëmbi i Kavajës në Durrës.
Bëhet fjalë për Aleks Markun, i cili mori peng dy fëmijët e tij në një apartament të marrë me qira dhe ka qëlluar disa herë me armë. Policia e Durrësit ka mbërrit pranë apartamentit të tij, rreth orës 02:20, por autori qëlloi disa herë nga dritarja.
Policia e Durrësit kërkoi ndihmën e Repartit Special “RENEA”, pasi duhej ndërhyrje e specializuar për të mos rrezikuar jetën e fëmijëve në banesë dhe të punonjësve të Policisë. Por “RENEA” shkoi në vendngjarje dhe i bëri thirrje 40-vjeçarit që të dorëzohej, ai vijoi të qëllonte nga dritarja e apartamentit.
Pas disa orësh negociata u bë i mundur neutralizimi dhe kapja e Aleks Markut, të cilit në banesë iu gjet një armë zjarri kallashnikov, një krehër me fishekë, si dhe 18 gëzhoja në brendësi të banesës.
Policia nxorri të 2 fëmijët, të cilët janë në gjendje të mirë shëndetësore dhe po iu jepet asistencë me psikologë.
Ende nuk dihen shkaqet që e çuan 40-vjeçarin të kryej këtë akt ekstrem. Ndërkohë janë publikuar edhe pamje nga ngjarja.
