Është publikuar momenti i atentatit ndaj kryeministrit sllovak Robert Fico, ku shkrimtari sllovak 71-vjeçar Juraj Tsintula e qëlloi 4 herë me armë zjarri pistoletë.
Momenti tronditës është filmuar nga kamerat e televizioneve, të cilat kanë qenë në transmetim “live” për të transmetuar përshëndetjen e kryeministrit me qytetarët pas mbledhjes së qeverisë. Mes tyre ndodhej edhe shkrimtari Juraj Tsintula.
Mediat vendase raportojnë se Tsintula fillimisht ka bërtitur në drejtim të Fico-s teksa ky i fundit po fliste me mbështetësit e tij dhe kur i është afruar për t’i dhënë dorën, ka hapur zjarr. Në video dëgjohen 5 të shtëna me armë zjarri.
Mediat sllovake raportojnë se Fico është dërguar me urgjencë në spital, ku pritet ti nënshtrohet një operacioni kritik për jetën e tij. Ai është plagosur nga katër plumba, tre prej të cilëve në pjesën e barkut, krahut dhe në këmbë. Gjendja e tij është kritike.
Tsintula thuhet se kishte në pronësi të ligjshme armën të cilën e përdori për të shtënë në drejtim të kryeministrit sllovak. Ai u arrestua menjëherë pas incidentit të përgjakshëm.
Ngjarja ndodhi përpara një qendre të komunitetit kulturor në qytetin Handlova, ku ishte mbajtur një mbledhje e qeverisë. Handlova është rreth 180 km (112 milje) në veri-lindje të kryeqytetit Bratislavë.
