Kryeministri Edi Rama ka pranuar se marrëdhëniet institucionale me shtetin grek kanë një ngërç, ku la të nënkuptohet se arsyeja është çështja e Fredi Belerit.
Ai theksoi se në aspektin personal i ka shumë të mira marrëdhëniet me homologun grek Kyriakos Mitsotakis.
“Raportet e mia me Kyriakos Mitsotakis janë shumë të mira në aspektin si të thuash personal. Përsa i përket roleve institucionale, dihet që ka një ngërç, dihet cili është ngërçi, e bën të vetëvetijshme edhe atë që reflektohet në marrëdhëniet mes dy qeverive. Ne kemi pasur një nënshtresë në këtë marrëdhënie ku gjërat kanë vijuar normalisht. Sot unë më mjafton dhe më tepron që isha “stari” i shqiptarëve të Greqisë.” – tha Rama në emisionin “Opinion”.
Rama u shpreh se pala shqiptare nuk ka konflikt me shtetin grek për shkak të çështjes “Beleri”, pasi nuk e konsideron të tillë këtë të fundit.
“Duhet të ketë një arsye që sot jemi në një situatë tjetër. Nuk jemi në një situatë konflikti. Unë këtë e shoh si një konflikt të perceptuar edhe të jetuar si të tillë nga pala greke por ne nuk kemi konflikt. Flas vazhdimisht drejtpërdrejt me të. Nuk ka një çështje me këtë emër për ne, nuk ekziston. Në këtë rast them që çështjet e përbashkëta kërkojnë zgjidhje. Çështja e ligjit të luftës është një çështje që ekziston, çështja e përcaktimit të kufijve detarë, çështja e përfundimit të procesit të pranimit të shqiptarëve me dokumentet e nevojshme dhe në këtë çështje është bërë një përparim i rëndësishëm dhe kam besim që së shpejti shqiptarët e Greqisë do marrin atë që presin. Dhe në këtë kuptim një çështje e mbetur pezull është një çështje e përbashkët. Çështje pastaj që mund t’i krijojmë ne, Shqipëria ose Greqia janë çështje që pala tjetër nuk është e detyruar të ndihet në nevojë për të dhënë një përgjigje” – tha Rama.
