Deputeti i PD-së, Lulzim Basha ka reaguar në lidhje me takimin që kryeministri Edi Rama mbajti këtë të diel me emigrantët shqiptarë në Athinë.
Përmes një postimi në rrjetet sociale, Basha pretendon se të pranishëmit në sallë nuk ishin emigrantët shqiptarë në Greqi, por administrata shtetërore e shpërngulur në Athinë vetëm për këtë takim.
FJalimin e kreut të qeverisë, Basha e konsideron si nacionalist dhe sipas tij, nacionalizmi shterpë është gjethja e fikut pas të cilës fsheh premtimet e pambajtura ndaj bashkëqytetarëve tanë në emigrim
“Kthim të mbarë administratës shtetërore të shpërngulur në Athinë për këtë ekskursion të shtrenjtë të kryeministrit që shpopulloi vendin dhe pengon votën e atyre që degdisi rrugëve të botës për shkak të keqqeverisjes dhe korrupsionit.
Nacionalizmi shterpë është gjethja e fikut pas të cilës fsheh premtimet e pambajtura ndaj bashkëqytetarëve tanë në emigrim, të cilëve u kemi borxh të drejtën e votës një orë e më parë”, shkruan Basha.
