Të shtëna me armë zjarri janë regjistruar pasditen e së shtunës në lagjen Salo Halili në Shkodër.
Burimet mediatike bëjnë me dije se 24-vjeçari Jaser Osmani, ka mbetur i plagosur në kofshë dhe ndodhet në spital jashtë rrezikut për jetën.
I riu është qëlluar me armë zjarri pranë banesës së tij. Sipas mediave, 24-vjeçari Jaser Osmani ka pasur një konflikt të çastit me autorin e ngjarjes dhe pas sherrit ky i fundit ka nxjerrë armën dhe e ka plagosur.
Pas sherrit mes tyre, autori ka ardhur në lagjen “Tophanë” në afërsi të banesës të Jaser Osmanit, duke e qëlluar me armë zjarri pistoletë.
Sipas uniformave blu, autori i dyshuar për ngjarjen është një 46 vjeçar, banues në Shkodër.
Shërbimet e Policisë kanë shkuar menjëherë në vendngjarje dhe vijojnë kontrollet për kapjen e autorit.
Gjithashtu grupi hetimor në drejtimin e Prokurorisë, po punon për zbardhjen e rrethanave të ngjarjes, identifikimin dhe kapjen e autorit.
- Njoftimi i policisë
“Rreth orës 16:00, në lagjen Salo Halili, dyshohet se gjatë një konflikti të çastit është plagosur në kofshë me armë zjarri pistoletë shtetasi J. O., 24 vjeç, i cili po merr ndihmë mjekësore në Spitalin Rajonal të Shkodrës dhe ndodhet jashtë rrezikut për jetën.
Shërbimet e Policisë kanë shkuar menjëherë në vendngjarje dhe vijojnë kontrollet për kapjen e autorit. Grupi hetimor në drejtimin e Prokurorisë, po punon për zbardhjen e rrethanave të ngjarjes, identifikimin dhe kapjen e autorit”, thuhet në njoftim.
