Kryeministri Edi Rama ka planifikuar një tur takimesh me komunitetin shqiptar në diasporë, të cilin do e nisë këtë të dielë, më 12 Maj, nga Athina.
Athina zyrtare i kërkoi kreut të qeverisë shqiptare, që ta shtynte pas 9 qershorit, për shkak të fushatës për zgjedhjet për parlamentin europian, por Rama këmbënguli që ta mbante më 12 Maj, e cila përklon edhe me 1-vjetorin e arrestimit të kryebashkiakut të zgjedhur të Himarës, Fredi Beleri.
Ndërkohë, media greke “Protothema” ka publikuar një artikull sot, ku raporton se deri më tani nuk ka asnjë hapësirë të rezervuar për takimin e kryeministrit Edi Rama me shqiptarët në Greqi.
“Edi Rama është ‘i pastrehë’ deri tani, pasi rezervimi i Stadiumit të Paqes dhe Miqësisë duket se nuk po ecën mirë për t’u grumbulluar aty. Kërkimi për një hapësirë kishte nisur me Teatrin e Krishtlindjes, por që u bllokua me kërkesë të kryebashkiakut”, shkruan Protothema.
Më tej thuhet se deri mëngjesin e sotëm, shqiptarët në Athinë nuk kishin bërë kërkesë zyrtare me shkrim për të rezervuar një hapësirë dhe të mblidhej bordi ta shqyrtonte. Sipas Protothema, një mundësi është salla “Melina Merkouri” që ka një kapacitet të vogël prej rreth 1000 personash, por kërkesa nga pala shqiptare është për një sallë me 4000-5000 vende.
“Pala shqiptare kërkoi verbalisht stadiumin e Olympiakos, por nuk e bënë kërkesën me shkrim.”, shkruan Protothema.
Ditën e djeshme, kryeministri grek Kyriakos Mitsotakis tha se vizita në Athinë e Ramës është e panevojshme, megjithatë shtoi se nuk mund ta pengojnë. Rama reagoi pas deklaratës së homologut të tij grek, ku tha se vizita e tij në kryeqytetin grek nuk ka lidhje me çështjet e brendshme të Greqisë apo me zgjedhjet e Parlamentit Evropian në Greqi.
Vizita e Ramës zhvillohet në një kohë kur kryeministri grek Kyriakos Mitsotakis e ka përfshirë Fredi Beleri në listën e 42 kandidatëve të Partisë “Demokracia e Re” në garën për një mandat në Parlamentin Europian. Beleri është dënuar nga GJKKO me 2 vite burg për krim zgjedhor.
Pë rreth një vit, Athina zyrtare ka këmbëngulur që atij t’i jepet leje për t’u betuar si kryebashkiak i Himarës, madje ka akuzuar shtetin shqiptar, për shkelje të të drejtave.
