Kreu i Partisë Demokratike Sali Berisha gjatë fjalës së mbajtur nga protestën e sotme, ka deklaruar se kjo është javë vendimtare për betejën ndaj kryebashkiakut të Tiranës Erion Veliaj.
Berisha tha se revolta dhe zemërimi i popullit do të bjerë me forcën më të madhe mbi Erion Veliajn.
Po ashtu i bëri thirrje kryebashkiakut që të japë dorëheqje dhe të vetëdorëzohet tek burgu 313-të.
Deklarata e Berishës:
Qytetarë dhe qytetare, pra Edi Rama që erdhi i damkosur si mister 20 përqindëshi, si njeriu që sipas raportit të OSBE-së kishte vendosur në bankat offshore gjatë periudhës që ka qenë kryetar bashkie 200 milionë euro, tani vazhdoi të çojë paratë e qytetarëve me Erion Veliaj në bankat offshore, t’i zhdukë ato në parajsën e tij.
Por në qoftë se këto janë vjedhje 100 përqind, e vërteta është se vjedhjet në Shqipëri gjatë këtyre viteve janë edhe 400, edhe 700, edhe 1200 përqind me vlerën dhe kostot e objekteve.
Të pangopur dhe të pashpirt, këta në vitin 2021 shpenzuan 30 milionë euro për një km autostradë nga Iba në Farkë.
Shpenzuan 30 milionë euro për një km rindërtim tek sheshi Shqiponja.
Ndërkohë autostrada 27 metra e gjerë Manastir- Bjeli Osek në Kroaci u ndërtua sipas standardeve të BE me 1.3 milion euro.
Miq, përveç guximit tuaj, përveç zemërimit tuaj, përveç revoltës suaj dhe vullnetit të Zotit, Shqipërinë nuk e shpëton asgjë tjetër.
Prandaj dhe kjo javë përgatit betejën vendimtare.
Erion Veliaj, je i marrë fund. Dorëhiqu dhe shko vetë te 313-a.
Shko se je hajduti më i shpërfytyruar që ka njohur kryeqyteti në historinë e tij.
Revolta dhe zemërimi i popullit do të bjerë me forcën më të madhe mbi ty.
