Të hënën, më 6 maj, Izraeli shënoi Ditën Kombëtare të Përkujtimit të Dëshmorëve dhe Heronjve të Holokaustit. Shteti i Izraelit bashkohet në përkujtimin e gjashtë milionë hebrenjve të vrarë nga nazistët gjermanë dhe bashkëpunëtorët e tyre gjatë Holokaustit. Kjo është një ditë përkujtimore personale dhe kolektive.
Sipas kalendarit hebre, kjo ditë simbolizon rënien e getos hebraike pas rebelimit të guximshëm të hebrenjve të Polonisë.
Sot në Izrael jetojnë 132,826 të mbijetuar të Holokaustit. 2500 të mbijetuar ishin viktima të sulmit të tmerrshëm të 7 tetorit. 2000 prej tyre u evakuuan nga shtëpitë e tyre.
Ambasada e Izraelit në Tiranë zhvilloi sot një ceremoni private në monumentin e Holokaustit, me komunitetin Hebre dhe Izraelit në Shqipëri.
Në fjalën e saj, Ambasadorja Galit Peleg, përmendi sulmin në jug të Izraelit më 7 Tetor, i cili konsiderohet si sulmi më i tmerrshëm ndaj popullit hebre që nga Holokausti. Ambasadorja iu referua gjithashtu antisemitizmit në rritje në Evropë dhe SHBA dhe u shpreh se askush nuk duhet të heshtë për këtë dhe se bota duhet të provojë se “Kurrë më” nuk është një thjesht një slogan bosh.
Ambasadorja Peleg tha se ashtu si 80 vjet më parë, Shqipëria tregon guximin e saj duke qëndruar e vendosur kundër antisemitizmit dhe terrorit.
