Edhe pse u zbulua me shkresë se ishte thirrë në SPAK, Erion Veliaj insiston se ka kërkuar vetë të dëshmojë para Prokurorisë së Posaçme.
Pavarësisht korrupsionit galopant në bashkinë e Tiranës, kryebashkiaku socialist Erion Veliaj vijon të mos shqetësohet madje nuk i merr seriozisht fletëthirrjet e SPAK dhe e quan si ‘vajtje me dëshirë’ vizitën e tij në Prokurorinë e Posaçme.
Gjithashtu kryebashkiaku ka dhënë shpjegime edhe pse i quajti kolegë “prokurorët” e SPAK.
“Deri tani ka qenë tabu që autoritet të bashkëpunonin dhe janë parë si armiqësore. Është normale që autoritet të kenë nevojë të sqarohen. E kam kërkuar prej kohësh bashkëpunimin zyrtar me SPAK-un për një palë që s’ka asnjë kompleks dhe ka shprehur gatishmëri. Ajo që duhet të na bëjë përshtypje është jo një njeri që respekton ligjin, por ata që refuzojnë dhe sulmojnë organet e drejtësisë.
Unë i quaj kolegë dhe ju të medias, pra njerëz që janë angazhuar në një vokacion publik sepse ka një mision të përbashkët. Kush i sheh si armiq nuk duan që disa institucione të funksionojnë”, ka thënë Veliaj gjatë një interviste për Top News.
Kujtojmë që disa ditë më parë shoqëria civile së bashku me opozitë protestuan përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
