Ministria e Arsimit ka hedhur për konsultim publik ndryshimet për ligjin për mjekët, ku ka reflektuar vendimin e Gjyktës Kushtetuese që e rrëzoi pjesërisht këtë ligj, duke reduktuar detyrimin për të punuar për pesë vite në Shqipëri, në tre vite.
Por studentët e Mjekësisë thonë se ashtu si vitin e shkuar, ministria nuk ka marrë parasysh mendimin e tyre, duke paralajmëruar edhe për protesta.
Kujtojmë që projekt-ligji që ndalon studentët e mjekësisë të largohen nga vendi menjëherë pas diplomimit u miratua mes shumë polemikash në korrik të vitit të kaluar. Ai u prit me protesta nga studentët, por qeveria i injoroi kurse Gjykata Kushtetuese në vendimin e saj tha se nisma ishte ligjore, por afatet e vendosura nuk ishin proporcionale.
Mikel Seferi, student i Mjekësisë: “Momentin që Gjykata Kushtetuese rrëzoi ligjin pse ministritë përkatëse nuk i ftuan studentët për të bërë takime dhe për të diskutuar se si ne mund t’i mbajmë studentët e Mjekësisë në Shqipëri. Çdo përpjekje apo çdo tentativë për të na injoruar në vazhdim do të ketë përgjigje po ashtu si një vit më parë. Protesta nuk përjashtohet asnjëherë”
Sipas studentëve ata janë duke diskutuar edhe për ndjekjen e hapave ligjore.
Mikel Seferi, student i Mjekësisë: “Ne tashmë jemi në bisedim e sipër me avokatët tanë dhe jemi drejt përfundimit të një drafti ligjor për ta çuar çështjen në gjyakatë edhe mbase Ndërkombëtare. Mbajtja peng e diplomës një dhe puna e detyruar dy nuk janë mënyra optimale edhe as ideale për të mbajtur mjekët në Shqipëri”
- Çfarë parashikon drafti i propozuar nga Ministria e Arsimit?
Në draftin e përgatitur nga ministria e Arsimit, i cili do jetë i hapur për konsultim publik deri më 29 Maj, propozohet ulje e viteve të detyrimit për të punuar në Shqipëri nga 5 në 3 vite për studentët e vitit të parë. Për studentët nga viti i dytë në të katërtin propozohet detyrimi në 2 vite nga 3 që ishte më parë ndërsa për vitet e pesta dhe të gjashta do të ketë vetëm 1 vit detyrim pune në institucionet shëndetësore publike. Po ashtu ndryshime ka patur edhe neni 6 për punësimin e tyre.
Në draft thuhet se Mjeku merr vendimin për punësim brenda 3 muajve nga lindja e së drejtës. Nëse punësimi i tyre nuk do të kryhet brenda afateve, mjekët e rinj do të paguhen me 80% të pagës edhe pa qenë në punë.
