Policia e Korçës ka arrestuar dy persona dhe ka proceduar penalisht dy të tjerë për vepra të ndryshme penale.
Mësohet se një 32-vjeçar me inicialet R.K është arrestuar në flagrancë pasi ka dhunuar nënën e tij të pajisur me urdhër mbrojtjeje. Një tjetër person është arrestuar pasi është kapur duke drejtuar automjetin në gjendje të dehur.
Dy persona janë proceduar në gjendje të lirë për veprat penale vjedhja dhe transportimi i drunjëve të prerë ilegalisht.
“U arrestua në flagrancë shtetasi R. K., 32 vjeç, banues në fshatin Zvirinë, Maliq, pasi në kundërshtim me urdhrin e gjykatës, dyshohet se ka dhunuar nënën e tij, e cila ishte e pajisur me urdhër mbrojtjeje.
U arrestua në flagrancë shtetasi M. Ç., 55 vjeç, banues në Ragusa, Itali, pasi në aksin rrugor “Pogradec-Qafë Thanë”, u kap duke drejtuar automjetin, në gjendje të dehur.
U referuan materialet në Prokurori, ku filloi procedimi në gjendje të lirë për një 16-vjeçar, banues në Pogradec, pasi në lagjen nr. 2, Pogradec, dyshohet se i ka vjedhur një bashkëmoshatari të tij, një celular, i cili iu gjet dhe sekuestrua në cilësinë e provës materiale. Gjatë këqyrjes së celularit u konstatuan faqe që shërbenin për vënien e basteve sportive.
U referuan materialet në Prokurori, ku filloi procedimi në gjendje të lirë për shtetasin N. Z., 33 vjeç, banues në fshatin Arrzë, Devoll, pasi në aksin rrugor “Miras-Bilisht”, në vendin e quajtur “Dëmbravë”, u konstatua duke transportuar me një automjet furgon, dru zjarri të prera në mënyrë të paligjshme. Sasia e druve u sekuestrua në cilësinë e provës materiale, së bashku me automjetin.”-njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë.
