Mijëra rulota besimtarësh kristianë shiheshin sot në fushën Nevoy, për eventin e përvitshëm evangjelik “Vie et Lumière” (Jetë e dritë) që gjallëron komunën e vogël të Loiret. Vitin e kaluar rreth 40 000 të tilla kishin ardhur në vendin që duhet mbante vetëm gjysmën e tyre, duke sjellë madje dhe disa ankesa nga vendasit.
Por organizatorët shfajësoheshin duke thënë se eventi i shërben të gjithë komunitetit.
“Ne nuk jemi këtu me pushime por për të sjellë fjalën e Zotit”, tha një prej pastorëve, mes besimtarëve në Nevoy.
Prej të dielës deri më 5 maj, rreth 22,500 pelegrinë janë mbledhur në konventën familjare e shpirtërore, që kërkon gjithashtu forca policie dhe një pikë ndihme mjekësore, thonë autoritetet për rrjetin AFP.
“Është shumë e rëndësishme për ne sepse jemi këtu për të shpërndarë dashurinë e Zotit”, thotë besimtari 42 vjecar Jordan Costallat, i cili shet varëse e objekte të vogla me simbolet e Jezusit. Pranë tij stenda të tjera ofrojnë Bibla, libra fetarë dhe regjistrime himnesh evangjelike.
Normalisht grupet mblidhen në mëngjes në 8:30 për lutjen e mëngjesit. Gratë me shami në kokë dhe burrat e tyre këndojnë me zë të butë e kokën ulur, duke dërguar kërkesat e lavdërimet e tyre për Zotin.
Kjo ndiqet më pas nga leximet e Biblës ndërsa pasdite ka një sesion të veçantë fetar dedikuar fëmijëve.
Pjesmarrësit thonë se në mbrëmje atmosfera bëhet më festive me këngë dhe dëshmi shërimesh apo konvertimesh, të rrëfyera mes pjesmarrësve.
“Ka sjellë rregull në jetën time, më parë dilja shumë bareve, por tani nuk dua më”, thotë mes të tjerëve 18-vjeçari Calvin Berini i cili pranon se është shumë më i lumtur.
“Mund të mos jemi feja më e mirë në botë por jemi ajo që është më afër fjalës së Zotit”, shton adoleshenti për rrjetin AFP.
