1 Maji njihet si Dita Ndërkombëtare e Punës. Ky manifestim lindi nga lufta e punëtorëve për të kërkuar dhe siguruar të drejtat, liritë dhe kushtet e punës e të jetesës. Qytetarë të profesioneve të ndryshme janë ngritur në protestë sot në vendin tonë. Ata kërkojnë rritje rroge, kushte më të mira pune dhe zbatim të ligjeve.
- Protesta tek Ministria e Arsimit
Dhjetëra mësues në vendin tonë kanë dalë në protestë këtë të mërkurë. Me pankarta dhe banderolë, ata marshuan nga Muzeu Kombëtar drejt Ministrisë së Arsimit ku protestuan për arsim cilësor, paga më të mira dhe kushte më të mira pune.
Nuk ka arsim cilësor pa arsim të mirëpaguar”, “Shpërblim në fund të vitit për mësuesit”, “Ta bëjmë më tërheqës profesionin e mësuesit”- shkruhej në pankarta dhe banderolë.
Një nga përfaqësuesit e sindikatës u shpreh se qeveria duhet të marrë masa urgjente për të përmirësuar gjendjen e arsimit në Shqipëri. Ai u shpreh se për arsimin duhet të një buxhet prej 5% të GDP, teksa shtoi se nëse nuk ka paga dinjitoze profesioni i mësuesit nuk do të jetë i kërkuar nga të rinjtë.
“Kërkesa jonë kryesore është që qeveria të marrë masa urgjente për të përmirësuar gjendjen e arsimit në Shqipëri. Ne, Sindikatat e Arsimit kemi kërkuar në të gjitha takimet qe kemi bërë që pa një buxhet 5 % të GDP për arsimin, nuk mund të ketë arsim cilësor në Shqipëri pa mësues të mirëpaguar.
Nëse nuk ka paga dinjitoze atëherë profesioni i mësuesit nuk do të jetë profesion i kërkuar nga të rinjtë. Ata që shkojnë në degën e mësuesisë janë ata me nota më të ulta”, tha përfaqësuesi i sindikatës.
Në fund të protestës, ata paralajmëruan se qeveria ka kohë deri në shtator për realizimin e kërkesave të tyre. Në rast të kundërt, arsimtarët paralajmëruan protesta të tjera, greva e madje edhe grevë urie.
- Protesta para Kryeministrisë
Qytetarë të profesioneve të ndryshme kanë protestuar para Kryeministrisë në Ditën Ndërkombëtare të Punëtorëve. Tek Kryeministria u mblodhën bashkë disa prej sindikatave në vend, të cilët theksuan se duhet të zbatohen të drejtat e punëtorëve në çdo vend pune dhe se pagat duhet të jenë të larta.
“Dinjitet për punëtorët”, shkruhet në një nga pankartat që protestuesit mbajnë në duar.
Një minator kërkoi marrjen e statusit teksa u shpreh se kërkesat e tyre nuk merren parasysh.
“Oficerët kanë status, të gjithë kanë status, jemi në kushtet më të vështira. Jemi të diskriminuar, të sëmurë, asnjë nuk merr parasysh kërkesat tona. I kemi dhënë ekonomisë shumë të ardhura, sot jemi të persekutuar”, tha një minator.
Ndërsa një përfaqësuese e sindikatës së arsimit deklaroi se duhet të dyfishohet paga dhe t’i kthehet vëmendja shkollave.
“Sot jemi përpara Kryeministrisë për të kërkuar dyfishimin e pagës së mësuesit. Gjithashtu kemi nevojë që Kryeministri të kuptoj që shkollat kanë nevojë për investime. Ministret e kanë kthyer shkollën në shkollë Facebook-u, ku imponohet mësuesve të bëjnë like e share e jo punën e tyre. Ti kthehet vëmendja shkollës”, tha ajo.
- Protesta në Rinas
Konfederata e Sindikatave të Shqipërisë ka zgjedhur po ashtu të protestojë këtë të mërkurë. Në Ditën e Punëtorëve, ata marshuan në rrugën e Rinasit, por pa bllokuar qarkullimin e automjeteve.
“Mos u largoni! Atdheu ka nevojë për ju”, “Atdheu është një pasuri që duhet ruajtur e mbrojtur”, “Të gjithë ata që duan Shqipërinë, mos të marrin arratinë”, janë disa prej mesazheve që kanë shkruar në pankarta, banera apo bluza protestuesit.
Kauza e tyre lidhet me shpopullimin, largimin masiv të të rinjve jashtë vendit vitet e fundit.
