Kryeministri Edi Rama ka reaguar pas SPAK rrëzoi padinë e vëllait të tij Olsi Rama të bërë ndaj kryetarit të Grupit Parlamentar të PD-së Gazment Bardhit në lidhje me akuzat që e implikojnë atë si të përfshirë në grupin e trafikantëve të laboratorit të kokainës në Xibrakë, të zbuluar në vitin 2014.
Përmes një postimi në rrjetin social ‘X’, Rama shkruan se Bardhi sipas SPAK nuk ka bërë kallëzim ndaj Olsi Ramës, ndërsa shprehet se “kallzimi që s’qenka bërë u është shitur si sapun për djathë italianëve të atij emisionit të turpshëm për Shqipërinë”
Gjithashtu Rama ka hedhur akuza të rënda ndaj Bardhit për të cilin thotë se “nuk është burrë” ndërsa ngre hipoteza se televizioni italian “Rai 3” ka marrë direktiva nga greu i grupit parlamentar të Partisë Demokratike për të nxjerrë “lakuriq” propagandën e kryeministrit shqiptar edhe në arenën ndërkombëtare.
Me pafytyrësinë më të madhe, kryeministri i Shqipërisë ka vijuar sulmet edhe ndaj mediave italiane, të cilat sipas tij, shpifin për shkak se nuk i bëjnë “fresk” qeverisë, por emisioni “Report” në “Rai 3” tregoi realitetin e lidhjeve mes qeverisë Rama me krimin e organizuar, korrupsionin e lartë të pushtetarëve dhe aferat miliona euroshe.
Reagimi i Ramës:
“Kam bërë kallzim” po kallzim s’paska bërë thotë SPAK-u, ndërkohë që kallzimi që s’qenka bërë iu është shitur si sapun për djathë italianëve të atij emisionit të turpshëm për Shqipërinë, të cilëve letrat e kallzimit inekzistent të ulëritur në parlament u janë ofruar si akte gjyqësore!
Hajde hajde ç’vete!
Për të sulmuar Shqipërinë me duart e të huajve, ky soj shqiposh ka që në vitin 1912 që nuk le poshtërsi, sajesë, hile e gënjeshtër pa e nxjerrë jashtë kufijve të këtij vendi, po kjo historia e kallzimit të pakallzuar për t’i shpëtuar rrezikut të dënimit për kallzim të rremë është një nivel i ri pafytyrësie karshi publikut shqiptar, se palo burra që hedhin gurin e fshehin dorën ka parë plot kjo tokë, po soj burri që të ngrejë dorën sikur ka hedhur gurin, duke u hakërryer si të kishte vrarë shtatë zogj me atë gur që s’paska ekzistuar fare, nuk na kishin zënë akoma sytë!
S’duhet të jetë burrë se s’ka mundësi, është thjesht çingije që ngre dorën duke kërcyer prehër më prehër sikur ka gur për të hedhur. Po s’ka shans që kjo gënjeshtër me fustan të shkurtër të mbetet pa dalë cullak faqe shqiptarëve, siç po dalin shpejt e shpejt cullak faqe italianëve edhe gënjeshtrat që ky soj shqiposh pa atdhe ia dha autorëve të atij emisionit skandaloz, për të kthyer në Itali kohën e vdekur kur Shqipëria ishte vend i zi dhe shqiptarët ishin delet e zeza të Europës!
Ta harrojë kush e tenton, ajo kohë nuk kthehet më se Shqipërisë dhe shqiptarëve s’u drejtohet dot më askush si të ishin jetimë pa identitet e pa gojë”, shkruan Rama.
Lexo edhe:
