Kryetari i Partisë së Lirisë, Ilir Meta mbrëmjen e sotme ka vijuar sulmet e nisura disa ditë më para ndaj kreut të SPAK, Altin Dumani.
Meta tha se sistemi gjyqësor në Shqipëri nuk është i pavarur dhe hodhi akuza duke deklaruar se në krye të çdo institucioni drejtësie është Engjëll Agaçi, sekretari i Përgjithshëm i Kryeministrisë.
“E vërteta është që në këtë vend gjykatat janë mbi gjithçka. Janë! Shefi i vërtetë, ose më saktë tutori i gjykatave, SPAK dhe çdo institucioni të drejtësisë është Engjëll Agaçi. Ai ka kontrolluar të gjithë procesin e vettingut dhe është shefi i vërtetë dhe njeriu më i paprekshëm. Sekretari i Përgjithshëm ka përgjegjësinë e parë ligjore. Ai është përgjegjësi kryesor për inceneratorët, PPP që po hetohen dhe çdo gjë tjetër. Nuk ka një SPAK të pavarur. Ky është bërë një zëdhënës politik, ka shkelur ligjin për SPAK. Ky flet në emër të të gjithëve, flet politikisht, kërcënon Arben Ahmetajn sepse thotë disa të vërteta që i dhembin këtij dhe Ramës. Ilir Meta ka qenë në SPAK dhe shkon kurdo që të thirret. Ai do më bëjë një pyetje unë do t’i bëj 10 pyetje. Nuk ekziston Dumani, është një vegël e Engjëll Agaçit”, tha Meta në vizion plus.
