Ka dështuar seanca gjyqësore në Gjykatën e Posaçme për inceneratorin e Tiranës, e planifikuar për ditën e sotme, ku SPAK do të sillte informacionin mbi hetimet për zyrtarët e arrestuar të Bashkisë së Tiranë.
Arsyeja e dështimit të seancës ka qenë mungesa e prokurorit të çështjes. Seanca e radhës është planifikuar të mbahet më 29 prill në orën 12:00.
Ndërkohë avokati Ermal Yezeiraj, i cili përfaqëson të arrestuarin Namik Simixhiu, ish-anëtar i komisionit të prokurimit të inceneratorit të Tiranës, ka paraqitur kërkesat për klientin e tij në GJKKO.
Sipas avokatit, Namik Simixhiu është me një veshkë që prej vitit 2011 dhe mjekësia ligjore është në dijeni të faktit. Kjo e fundit ka rekomanduar që të merret aprovim nga Drejtoria e Burgjeve që t’i bëhen kontrolle mjekësore, përkundrejt pagesës përkatëse e kërkesës zyrtare të mbrojtjes.
Kjo procedurë ndonëse e kryer, thotë mbrojtja, ka ndeshur në moskthimin e përgjigjes nga burgjet prej katër muajsh, për të dhënë aprovimin e kryerjes së vizitave shënderësore, teksa sjell në vëmendje se kjo situatë mund të sjellë pasoja për Simixhiun, që ndodhet në burg.
Kujtojmë se dhjetorin e kaluar GJKKO caktoi disa masa sigurie për ish-zyrtarët që firmosën tenderin e konsideruar korruptiv të inceneratorit të Tiranës. Arrest në burg u caktua për Lefter Kokën, Alqi Bllakon, Bledar Karolin, Taulant Tushëm e Namik Simixhiu. Ndërsa në “arrest shtëpie” u lanë Alba Thoma, Valbona Ballgjini, Sidita Temali, Pëllumb Abeshi, Etleva Kondi dhe Silena Tola.
Hetimet për inceneratorin e Tiranës, SPAK i ka ndarë në disa fraksione dhe ende deri më sot, kreu i Bashkisë së Tiranës, Erion Veliaj vazhdon të jetë i paprekshëm, edhe pse janë miliona euro, për një incenerator që në terren nuk ekziston.
