Pasi kanë bojkotuar pa arsye 4 seanca rresht në komisionin hetimor parlamentar për koncesionet në shëndetësi, deputetët e Partisë Socialiste pritet të rikthehen në seeancën e sotme, që pritet të nisë në orën 13:00.
Opozita dhe mazhoranca do të diskutojnë sot për planin paraprak të hetimit e kërkesat e dakordësuara për informacion dhe PS ka gati edhe planin që do të propozojë.
Socialistët do të propozojë përfshirjen në planin e hetimit parlamentar të vizitave në terren për të parë nga afër sesi janë zbatuar kontratat: ajo e check-upet dhe sterilizimit, si dhe intervista të ndryshme me stafin dhe pacientët.
Gjithsesi, duhet theksuar se ngritja e këtij komisioni, nuk ishte për qëllimin nëse a është bërë sterilizimi apo jo, por se me çfarë kostosh është bërë, a kanë shkuar lekët tek të afërmit dhe të njohurit e zyrtarëve të lartë dhe a janë vjedhur paratë publike të taksapaguesve shqiptarë.
Struktura organizative e Planit Hetimor ka 7 hapa si më poshtë.
- Hapi 1: Përcaktimi i Qëllimeve dhe Objektivave të Hetimit
- Hapi 2: Përcaktimi i Kufijve dhe Juridiksionit të Hetimit
- Hapi 3: Strukturimi i Ekipit Hetimor
- Hapi 4: Planifikimi i Procesit të Mbledhjes së provave
- Hapi 5: Seanca të Dëgjimit dhe Analizë
- Hapi 6: Raportimi dhe Rekomandimet
- Hapi 7: Ndërmarrja e Veprimeve të Mëtejshme
Drafti i ekspertëve të mazhorancës ka të përcaktuar qartë edhe kalendarizimin e Planit Hetimor duke iu përmbajtur afatit 4 mujor të miratuar nga Kuvendi.
Zhbllokimi i punës në Komisionin Hetimor për koncesionet në shëndetësi vjen pasi opozita kërkoi ndërhyrjen e Lindita Nikollës dhe pas një takimi që kreu i grupit parlamentar Gazment Bardhi pati me kryeparlamentaren, takim në të cilin u informua se nuk ka një vendim politik të PS për të bojkotuar punën e komisioneve hetimore, por se palët duhet të gjejnë gjuhën e përbashkët brenda komisionit.
Komisioni Hetimor i Koncesioneve në Shëndetësisë ka hartuar deri më tani vetëm listën e dëshmitarëve, ku do të thirret si dëshmitar kryeministri Edi Rama ish ministrat Beqaj e Manastirliu, ministrja Albana Koçiu e të tjerë funksionarë apo ish funksionarë të lartë të ministrisë së shëndetësisë
