Deputeti i PD-së, Lulzim Basha është shprehur se askush nuk ka përfituar më shumë politikisht nga Edi Rama në këto 11 vite se sa Ilir Meta. Ai tha se Meta për shkak të koalicioneve me të, një herë ka qenë në mandat qeverisës dhe në mandatin e dytë u bë president.
“Askush nuk ka përfituar politikisht nga Edi Rama në këto 11 vite sesa Ilir Meta. Është bërë pjesë e koalicionit qeverisë në mandatin e parë, është bërë president në mandatin e dytë. Dhe kjo simbioz vazhdon”, u shpreh ai.
Basha tha se Ilir Meta ka mbërritur në fundin e rrugës së tij politike. Akuzat e Metës ndaj tij, në lidhje me mosfutjen në zgjedhje dhe djegien e mandateve, Basha i konsideroi si një trillim, teksa në lidhje me dosjen e spiunit I.M., nëse nuk del asgjë e vërtetë, sipas tij, kemi të bëjmë prap me një pazar mes Ramës dhe Metës.
“Të gjitha akuzat e Metës ndaj meje janë një trillim. Është tashmë fakt i njohur jo vetëm nga demokratët, por dhe nga publik i gjerë që Ilir Meta vazhdon të ekzistojë politikisht për aq sa ekziston akoma. Se ka shumë që thonë që nuk ekziston më, është fundi i rrugës së tij, për shkak të trafikimit që i ka bërë votave dhe influencës së demokratëve. Mos harroni që në 2013-ën, pasi u denoncua nga zoti Rama për videon e famshme që shkaktoi dhe 21 janarin, u përqafua nga zoti Rama.
Shumë thonë për arsye të një këmbimi imuniteti nga pasojat e veprimeve të tij të mëparshme. Dhe më pas po me lojërat e tij politike, po nga Edi Rama u zgjodh president i Republikës. Pra, askush nuk ka përfituar politikisht nga Edi Rama në këto 11 vite sesa Ilir Meta. Është bërë pjesë e koalicionit qeverisë në mandatin e parë, është bërë president në mandatin e dytë. Dhe kjo simbioz vazhdon. Ju e mbani mend tërsëllimën me të cilën nisi çështja e hetimit të spiunit I.M. E kam fjalën në anën institucionale të çështjes.
Pra, në momentin që diçka futet në rrjedhën institucionale, institucionet duhet ta nxjerrin haptazi se cila është e vërteta. Dhe në veçanti autoriteti i dosjeve nuk mund të fle mbi këtë dosje, që vet e denoncuan, vet e çuan tek kryetarja e Kuvendit dhe nga këtu thirrja ime është e qartë: ose të nxjerrin dosjen, ose t’i kërkojnë falje Ilir Metës. Sigurisht nëse ndodh e dyta, është pazari tjetër i Edi Ramës me Ilir Metën”, tha Basha për Top News.
