Ambasadori i Bashkimit Evropian në vendin tonë, Silvio Gonzato ka reaguar pas sulmeve të njëpasnjëshme të Ilir Metës ndaj SPAK dhe kreut të Prokurorisë së Posaçme Altin Dumanit.
Në një aktivitet në qytetin e Vlorës, Gonzato tha se nuk është e denjë gjuha e përdorur nga Ilir Meta ndaj organeve të reja të drejtësisë.
“Nuk mendoj se sulmet ndaj gjyqësorit janë të denja për demokracinë. Kemi folur kështu që dua ta lë me kaq“, është shprehur Gonzato.
Kujtojmë qe kreu i PL një ditë më parë (17 prill), në një konferencë për mediat, hodhi akuza të rënda ndaj Dumanit, ku e cilësoi atë si “palaço” dhe “injorant”. Sipas Metës, SPAK dhe Dumani janë në shërbim të kryeministrit, Edi Rama.
Kreu i PL-së, Ilir Meta ka hedhur akuza të forta ndaj Prokurorisë së Posaçme duke thënë se kreu i saj Altin Dumani mbështetet nga amerikanët për të sulmuar atë.
Gjatë intervistës në ‘Opinion’, Meta tha se sipas informacioneve të tij, Altin Dumani ka patur takime me agjentin e korruoptuar të FBI-së Charles McGonigal. Ndërsa kryeprokurori i Prokurorisë së Posaçme Altin Dumani reagoi duke thënë se akuzat janë të pabaza dhe bëhen për shkak të institucionit që ai drejton. Po ashtu ai ka theksuar se ai nuk është takuar kurrë me McGonigal dhe se emrin ia ka dëgjuar pas publikimit në mediat shqiptare.
Bëjmë me dije që Ambasada e SHBA dhe ajo Britanike reaguan duke dënuar gjuhën e ashpët që përdori Ilir Meta ndaj SPAK-ut.
