Ditën e sotme, parlamenti do të votojë nëse raporti për mandatin e deputetes socialiste, Olta Xhaçka, do të shkojë për verifikim në Gjykatën Kushtetuese.
Grupi parlamentar i Partisë Demokratike kërkon dërgimin e çështjes në Kushtestuese në mënyrë që të konstatohet papajtueshmëria e mandatit të deputetes Olta Xhaçka. Ata mendojnë se bashkëshorti i Xhaçkës, si investitor strategjik, ka përfituar pasuri publike dhe rrjedhimisht edhe vetë deputetja e qarkut të Korçës, çka bie ndesh me përcaktimet kushtetuese për deputetët.
Zvarritja e mandatit të Olta Xhaçkës
Parlamenti mori në shqyrtim mandatin e deputetes dhe ish-ministres së Mbrojtje dhe të Jashtme, Olta Xhaçka, një vit e gjysëm pasi Gjykata Kushtetuese e detyroi që të dërgonte pranë saj çështjen për shqyrtim.
Në Shkurt të vitit 2023, Gjykata Kushtetuese pranoi pjesërish kërkesën e një grupi deputetësh, të cilët kërkonin që të detyrohej Parlamenti të dërgonte pranë asaj gjykate kërkesën për shqyrtimin e mandatit të Xhaçkës, ndaj të cilës ekzistojnë dyshime për konflikt interesi.
Në Mars të vitit 2021, Komiteti i Investimeve Strategjike, i drejtuar nga kryeministri Edi Rama, miratoi statusin e “investitorit strategjik” për Artan Gaçin, bashkëshorti i Xhaçkës dhe ish-deputet i Partisë Socialiste, me qëllim ndërtimin e një resorti turistik në Gjilekë të Dhërmiut, në zonën e Himarës.
Një vit më pas, në vitin 2022, Këshilli i Ministrave miratoi dhënien pa qira në favor të projektit të Gaçit të vijës bregdetare para resortit turistik.
Këto lëvizje u konsideruan si “konflikt interesi” nga ana e opozitës, pasi Olta Xhaçka në atë kohë ishte pjesë e kabinetit qeveritar, në pozicionin e Ministres së Jashtme.
Me kërkesën e opozitës, Parlamenti ngriti një Komision Hetimor. Siç ndodh rëndom, palët politike u ndanë në rezultatet e këtij Komisionit. Maxhoranca parlamentare socialiste e Edi Ramës konstatoi se Olta Xhaçka nuk ishte në kushtet e konfliktit të interesave dhe vendosi të mos e përcillte çështjen e vlefshmërisë së mandatit të saj në Gjykatën Kushtetuese.
Nga ana tjetër, opozita këmbënguli se raportet e Komisionit Hetimor duhet të dërgoheshin në Kushtetuese, e cila nga ana e saj duhet të shqyrtonte rastin “Xhaçka” në dritën e nenit 70, pika 2 e Kushtetutës, që parashikon kushtet e humbjes së mandatit të deputetit.
Pas refuzimit të shumicës parlamentare për të dërguar çështjen në Kushtetuese, dy grupime të opozitës iu drejtuan asaj Gjykate.
Një grupim i vogël opozitarësh, të grupit “Basha-Alibeaj” kërkuan nga Kushtetuesja që të detyronte Parlamentin për t’ia përcjellë asaj gjykate rastin e Olta Xhaçkës.
Ndërsa një grup më i madh deputetësh opozitarë, kërkuan nga Gjykata Kushtetuese që të merrte drejtëpërdrejtë në shqyrtim mandatin e Xhaçkës.
Gjykata Kushtetuese, me një manovër më shumë politike se sa ligjore, legjitimoi kërkesën e grupit të vogël opozitar, duke i kërkuar Parlamentit që t’ia dërgonte për interpretim çështjen e deputetes socialiste.
Kjo zvarritje u vijua më tej në Parlament. Shumica socialiste, e përfaqësuar nga kryetarja e Parlamentit, Lindita Nikolla, nuk e vendosën çështjen “Xhaçka” për shqyrtim në seancë plenare, por vendosën që ta rikthenin sërish për diskutim në Këshillin e Mandateve dhe Imunitetit, duke e shtyrë në kohë vendimin për themelin e çështjes.
Tashmë, është ende e paqartë nëse rasti do t’i përcillet Gjykatës Kushtetuese.
Po ashtu në seancën e sotme shkon për votim edhe ngritja e Komisionit të Posaçëm për influencën ruse, ndryshe komisioni “Për të koordinuar dhe mbikëqyrur të gjitha veprimet institucionale për të luftuar dezinformimin dhe format e tjera të ndërhyrjes së huaj në proceset demokratike të vendit”.
Komisioni ka objekt të veprimtarisë së tij të nxisë identifikimin e ndërhyrjes së huaj në proceset demokratike përmes një sërë formash, duke përfshirë mediet dhe rrjetet sociale, mbështetjen financiare të aktorëve publikë dhe të shoqërisë civile.
Komisioni përbëhet nga 11 anëtarë që përfaqësojnë të gjitha grupet parlamentare dhe drejtohet nga përfaqësuesi i shumicës parlamentare.
