Ka nisur protesta e fermerëve dhe blegtorëve shqiptarë për subvencionet. Fermerët janë nisur me traktorët e tyre nga Kavaja, Vlora, Berati, Fieri dhe Lushnja drejt rrethrotullimit të Savrës në autostradën Lushnje-Fier.
Fermerët kanë bllokuar autostradën Lushnje-Fier me traktorët e tyre në mënyrë demostrative për padrejtësinë që, sipas tyre, po u bëhet nga industria e qumështit, për skemat e subvencionimit, dhe një sërë institucionesh në fjalë si AKU, Autoriteti Konkurencës, Drejtoria e përgjithshme e tatimeve, Drejtoria e Përgjithshme e Doganave dhe Ministria e Bujqësise dhe e Zhvillimit Rural.
Blegtorët protestojnë për uljen e çmimit të qumështit nga fabrikat grumbulluese. Ata pretendojnë se që prej datës 1 prill qumështi është ulur me 100 lekë të vjetra për litër. Ata thonë se çmimi i qumështit nuk i favorizon për tu zhvilluar dhe në shenjë proteste, një bot, derdhi qumështin në autostradë.
“Ja ku shkoi gjaku i fermereve“- thotë një protestues.
Policia ka lejuar makinat të lëvizin edhe pse mes qumështit, ndërkohë një blegtor thotë i revoltuar: “Është turp të lini makinat të kalojnë mes qumështit”.
Me pankarta në duar ku shkruhej: “Nuk duam të emigrojmë”, “Bojkotoni qumështin serb”, ata kërkuan ndërhyrje në regullimin e tregut nga qeveria, për të treguar më shumë respekt për prodhimin vendas. Ata pretendojnë se qumështi i tyre derdhet në kanale, ndërsa importet mbysin tregun.
